Tributária Kovalima rejista empreza 145 ativa selu taxa ba Estadu
KOVALIMA, 02 Setembru 2025 (TATOLI) – Ministériu Finansa (MF), liuhusi Diresaun Repartisaun Tributária Munisípiu Kovalima (RPTMK) rejista empreza hamutuk 145 mak ativa konstribui reseita ba kofre Estadu.
“Empreza sira ne’ebé mak kontribui reseita mak empreza sira loke loja, restaurante sira selu depende sira nia reseita, nune’e ita-nia empreza sira mak sura, prense no selu rasik “,Diretór Repartisaun Tributária Munisípiu Kovalima, Luarentino Amaral, hato’o ba TATOLI, iha nia servisu fatin Bairru Kosta, ohin.
Bazeia ba dadus, iha fulan-Juñu ne’e, Tributária Kovalima rejista empreza hamutuk 145 ne’ebé selu ona reseita hamutuk $2,025.51 ba kofre Estadu. Alende iha fulan-Agostu ne’e empreza lima mak foin selu taxa ho totál reseita hamutuk $105. .
Dirijente ne’e dehan, durasaun tempu ba empreza sira atu selu taxa hahú iha loron 1 to’o loron 15 kada fulan, nune’e sei fó biban ba empreza atu kontribui taxa bainhira liu ona loron 15 tanba empreza tauk aplikasaun penalidade.
Diresaun Tributária Kovalima hasoru difikuldade hanesan menus rekursu umanu hodi halo kombransa ba empreza sira tanba funsionáriu na’in-tolu de’it mak ativa iha munisipiu referidu.
“Ho funsionáriu tolu de’it ami labele tun ba tereñu atu halo kombransa bainhira empreza sira la ativa atu selu taxa ami submete de’it karta tanba bainhira sai ba tereñu ema laiha atu halo atendementu ba kontribuente sira iha edifísiu”, nia afirma.
Ho problema menus funsionáriu hanesan dirijente la lakon vontade, hodi kontinua hala’o servisu liuliu buka meiu hodi partilla informasaun liuhosi submete karta avizu ba empreza sira no hala’o koordenasaun ho CCI Munisípiu Kovalima .
Jornalista: Celestina Teles
Editór: Florencio Miranda Ximenes
