CSSI Kovalima finaliza rejista kandidatu foun ba asesu programa bolsa da mãe
KOVALIMA, 03 Setembru 2025 (TATOLI) – Sentru Solidariedade Sosiál no Inkluzaun (CSSI),Munisípiu Kovalima finaliza ona halo rejista kandidatu benefisiáriu foun atu asesu ba programa bolsa da Mãe kondisionál iha sistema sigas .
“Prosesu rejista kandidatu benefisiáriu foun ne’ebé atu asesu ba programa bolsa da Mãe, ita finaliza ona no rejista iha sistema sigas Ministériu Solidariedade Inkluzaun Sosiál (MSSI)”, Xefe Unidade Asisténsia Inkluzaun Sosiál , Nelson de Jesus, relata dadus ne’e , ba Tatoli iha nia servisu fatin, Suai Loro, ohin.
Tuir dadus iha sistema Sigas hatudu benefisiáriu atu asesu ba programa Bolsa da Mãe kondisionál hamutuk 2,117 mai husi postu administrativu Fatululik,Fohorem, Fatumea, Tilomar, Maucatar, Suai no Zumalai.
“Sistema Sigas MSSI atu rekolla informasaun husi kandidatu benefisiáriu foun ne’ebé mak iha hodi identifika kandidatu sira ne’e elizivél ka la’e sistema mak sei deteta hafoin halo pagamentu”, nia esplika.
Fó hanoin fali katak Governu dasia halo mudansa ba prosesu pagamentu ba benefisiáriu bolsa da mãe kondisionál iha tinan kotuk implementa labarik na’in ida kada-fulan hetan $5, maibé dadaun ne’e pagamentu haree ba alunu sira-nia nivél edukasaun hanesan alunu ne’ebé eskola primária kada fulan ema ida iha direitu ba $8.00, EBC $9.00 no alunu ba ensinu sekundáriu kada fulan $10.00 .
Prosesu pagamentu ba programa benefisiáriu bolsa mãe kondisionál tinan-ida hala’o dala-ida ne’ebé pagamentu hala’o kada fulan neen, molok ne’e loron fiksu pagamentu iha fulan-Maiu, daudaun ne’e depende ba situasaun no sistema.
Tuir planu Ministériu Solidariedade Sosiál no Inkluzaun sei hala’o pagamentu ba benefisiáriu bolsa da Mãe kondisionál iha fulan-Setembru ou Outubru ne’e.
Jornalista: Celestina Teles
Editór: Florencio Miranda Ximenes
