DILI, 03 Setembru 2025 (TATOLI)—Ministériu Justisa (MJ) iha tempu badak nia laran sei foti desizaun ba kandidatu Majistradu Judisiáriu ne’ebé la admitu ba faze Juíz estájiu, hafoin konklui formasaun kursu dahituk iha Sentru Estudu Jurídiku Judisiáriu iha Portugal.
Ministru Justisa, Sergio Hornai informa, kandidatu Majistradu Judisiáriu antes ne’e iha na’in-13, kandidatu Majistradu Ministériu Públiku iha na’in-hitu no kandidatu Defensór Públiku iha na’in-haat.
“Sira ba kontinua sira-nia formasaun iha Portugal durante tinan-ida no foin daudaun fila mai Timor-Leste, maibé iha kandidatu Juíz na’in-13 ne’e iha na’in-ida mak la admitidu ba faze Juíz estájiu, nune’e kandidatu Juíz ne’e halo rekursu no rekursu agora la’o hela, sira submete ona mai ha’u no agora iha ha’u-nia meza,” Ministru hateten ba Jornalista sira iha Palásiu Governu, Kuarta ne’e.
Notísia relevante : Lúcia Lobato lamenta Parlamentu mak halo rekrutamentu ba juíz Konsilleiru
Nia dehan, durante ne’e simu informasaun no akompaña iha mídia kona-ba kestaun ne’e, maibé hanesan Ministru Justisa seidauk foti desizaun tanba seidauk lee relatóriu husi Sentru Formasaun Jurídiku Judisiáriu no rekursu kandidatu nian.
“Kuandu ha’u haree, konserteza ha’u sei fó resposta ba rekursu ne’ebé mak iha,” nia akresenta.
Ministru tenik, presiza apura didi’ak faktu no prova, kona-ba infrasaun tanba sá mak iha instituisaun própriu bele iha desizaun própriu hodi indefere ka la halo admisaun ba pesoál ida atu sai Juíz estájiu,” nia katak.
Governante ne’e haktuir, kandidatu feto ida mak la pasa ba faze estájiu.
“Agora ha’u seidauk iha relatóriu no rekursu ne’e bainhira ha’u haree dokumentu konserteza ha’u tenke apresia tanba ne’e ha’u-nia kompeténsia no iha duni razaun atu ba duni ida ne’ebá,” nia hato’o.
Jornalista : Natalino Costa
Editora : Julia Chatarina
