OEKUSI, 04 Setembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio Servantes Romeia da Cruz Salu, kinta ne’e, deklara ofisialmente hodi desmantela ka hapara totál funsionamentu ofisiál mídia sira-ne’ebé durante ne’e, hala’o serbisu iha kada diresaun rejionál sira.
“Ha’u deklara katak, desmantela hotu serbisu mídia komunikasaun husi autoridade sesante, efetivu hahú loron 01 Setembru 2025, ne’ebé iha kompeténsia tomak atu retoma ida-ne’e, nune’e ita koloka serbisu sira-ne’ebé nesesita duni. Pájina ofisiál mídia RAEOA, ha’u sei remodela, ita sei estabelese serve ida, atu ita serbisu ho kmaan, tanba ita sei barakliu serbisu iha térrenu, 40% tenke iha edifísiu laran,” nia dehan baihira hala’o enkontru alargada ho funsionáriu sira iha salaun administrasaun Numbei, ohin.
Notísia relevante:KM aprova rezolusaun ezonera Prezidente-membru autoridade RAEOA iha 31 Agostu
Tanba ne’e rekomenda ba Diresaun Rejionál Pátrimóniu Estadu no Lojístika, presiza alista fasilidade no ekipamentu kada diresaun asegura ona.
“Iha sirkulár ne’ebé ha’u sei fó sai, artigu 3.o, ha’u hakotu ona, unidade mídia ne’ebé eziste – kria iha mandatu anteriór. Ha’u husu ba Diresaun Pátrimóniu Estadu no Lojístika, dada fila-fali aparelu mídia sira-ne’e, atu haree komunikasaun ne’ebé dignu, defende Estadu no povu ne’e, kanalizadu,” nia dehan.
Autoridade RAEOA koordena ona ho antigu Prezidente CI
Nia informa, Gabinete Prezidente Autoridade RAEOA, koordena ona ho Antigu-Prezidente Konsellu-Imprensa Timor-Leste, Otélio Ote, hodi sai nu’udar seniór tékniku ba komunikasaun sosiál nian iha Oekusi.
“Ha’u imediatamente, husu no bolu Otélio Ote, nu’udar Eis-Prezidente Konsellu-Imprensa Timor-Leste, atu sai hanesan seniór tékniku ba polítika komunikasaun sosiál, hodi fokuliu atu promove Oekusi, la’ós atu taka ema nia mídia, no la’ós atu taka ema asesu ba mídia sosiál sira, la’ós atu taka ema nia direitu atu espresa nia krítiku, nune’e bele ajuda Estadu no Governu inklui líder sira, asegura boa-governasaun,” nia hateten.
Notísia relevante:Membru Autoridade RAEOA ezoneradu entrega ona viatura ba patrimóniu Estadu
Jornalista: Abílio Elo Nini
Editór: Rafael Ximenes de A. Belo
