BAUKAU, 04 Setembru 2025 (TATOLI)—Komunidade iha Postu Administrativu Baguia, Munisípiu Baukau, sente kontente ho rezultadu konsulta populár maibé iha tempu hanesan kahor ho ta’uk.
Lúcio Freitas Salvador nu’udár polling staff ne’ebé hola-parte hodi organiza Konsulta Populár iha 30 Agostu 1999, esplika durante preparasaun antes hakat ba votasaun iha Baguia nakonu ho situasaun difísil maibé nafatin konsolida malu liuhusi kampaña ne’ebé prepara husi membru Konsellu Nasionál Rezisténsia Timorense (CNRT-sigla portugeza).
“Problema mak ema barak ta’uk atu envolve iha polling staff entaun obriga de’it mezmu koko esplika no hetan enkoraja husi staff UN,” Lúcio ba TATOLI iha Postu Administrativu Baguia, Kinta ne’e.
Notísia relevante: Família Maksalak realiza semináriu komemora loron-04 Setembru iha Baguia
Lúcio haktuir preparasaun ne’ebé polling staff halo mak resensiamentu eleitorál durante loron-22 hodi hetan kartaun votante no apoia husi parte Igreja tanba fasilita sédula ba sidadaun balun maski idade seidauk to’o.
Enkuantu, edukasun votante divulgadu liuhosi mídia, pamfleitu maibé parte ekipa Konsulta Populár nian maioria hala’o liuhosi tama-sai uma komunidade liuliu iha tempu kalan.
“Obstákulu ba ami mak ameasadu husi forsa Indonézia tanba maioria polling staff ne’e afiliadu CNRT nian,” Lúcio hateten.
Eis Diretór STAE Munisipiu Baukau salienta sentru votasaun iha tempu ne’ebá hahú tuku 08:00 Otl no ramata iha tuku 03:00 loraik no polling staff hamutuk ho komunidade hahú retira bá fatin seguru no kontinua observa situasaun hodi hein rezultadu eleisaun.
Nia subliña bainhira rona rezultadu Konsulta Populár iha lorokraik purvolta tuku 04:00 Otl liuhosi rádiu maski kontente maibé nafatin asegura aan iha fatin seguru tanba forsa Indonézia sei konsentra iha Postu Baguia antes retira iha loron-09 Setembru.
Maibé, komunidade iha Baguia sente seguru tanba liuhosi Komandante Lere Anan Timur garante seguransa iha área Atelari, Postu Administrativu Laga ne’ebé sai sentru konsentrasaun ba FALINTIL.
“Istória luta libertasaun sai referénsia, hahú ho kilat no hakotu ho pregu no surat-tahan nune’e husu joven sira atu estuda tanba só matenek mak bele kontribui ba dezenvolvimentu nasionál,” Lúcio hato’o.
Totál sentru votasaun ne’ebé estabelese iha Baguia hamutuk tolu ho estasaun votu sia kompostu Alawa, Lavateri no Iarabau, Haekoni ho totál polling staff hamutuk 51 ne’ebé kada sentru koloka ema 17.
Entretantu, rezultadu Konsulta Populár fó-sai iha loron-04 Setembru hatudu povu maioria rejeita autonomia ho totál eleitór 344.480 korresponde ho pursentu 78,50, enkuantu votu ba aseita autonomia hamutuk 94.388 ka pursentu 21,50.
Jornalista: Natalino Belo
Editór: Xisto Freitas da Piedade
