DILI, 04 Setembru 2025 (TATOLI)-–Embaixadora Estraordinária no Plenipotensiária Repúblika Kuba nian iha Timor-Leste, Grisel Alina Aldamos Inniss, iha kompromisu katak sei kontinua atu dezenvolve kapitál umanu Timor-Leste nian liuhusi parseria sira iha área saúde, edukasaun, kultura, no desportu.
Kuba la’ós de’it forma médiku Timor-Leste iha área medisina no desportu iha Universidade Nasionál Timor Lorosa’e (UNTL), maibé mós kontinua oferese bolsa estudu ba formasaun espesializada iha Kuba.
“Tinan-tinan, Timor-Leste iha oportunidade atu haruka estudante bolseiru sira ba estuda iha Kuba. Aplikasaun sempre nakloke no Governu Timor-Leste deside estudante sira tuir kada tinan,” Embaixadór ne’e hateten ba Tatoli iha Salaun Oka, Surikmas, ohin.
Reprezentante kubanu ne’e relata katak, Kuba mós oferese bolsa estudu iha arte no kultura iha área múzika, dansa no arte vizuál.
“Iha estudante timoroan na’in-neen (6) mak hala’o ensinu superiór iha arte sira iha nasaun ne’ebá, ho lisensiatura sira iha múzika, dansa, no arte vizuál sira. Projetu ne’e hanesan parseria ida ho Sekretaria Estadu Arte no Kultura nian, hodi kontinua programa ida-ne’ebé hahú iha tinan balun liubá, bainhira estudante timoroan na’in-13 estuda iha eskola arte kubanu sira,” nia hateten.
Grisel Alina Aldamos Inniss afirma, Kuba la’ós de’it fó apoiu ba formasaun artístika maibé mós kolabora ho setór desportu iha Timor-Leste.
Treinadór Kubanu sira daudaun ne’e fó apoiu ba ekipa nasionál voleiból, atletizmu no tiru arku, nune’e mós akompaña ekipa juvenil sira iha torneiu internasionál sira, hanesan torneiu sub-10 iha Indonézia.
“Ami-nia polítika bazeia ba prinsípiu katak edukasaun no kuidadu saúde hanesan direitu livre ba ema hotu. Iha Kuba, ema hotu bele estuda, la haree ba idade-to’o avó sira, karik sira hakarak, bele tuir universidade,” nia dehan.
Responsável ne’e relata katak apoiu kubanu mós habelar ba setór ensinu báziku, ho énfaze iha programa alfabetizasaun españól ne’ebé tradús ba tétum no implementa iha pasadu ho susesu boot.
Jornalista : Felicidade Ximenes
Editór : Cancio Ximenes
