KOVALIMA,04 Setembru 2025 (TATOLI)– Pesoál Saúde iha munisípiu Kovalima hala’o konsulta saúde ba sobrevivente masakre Setembru Negro 1999.
“Ita hala’o atividade konsulta saúde ba sobrevivente sira ne’ebé mak moras tanba hetan baku no seluk tan”, Prezidente Autoridade Munisípiu Kovalima Miguel Armada Cardoso hato’o liuhusi nia diskursu, iha monumentu Masakre Setembru Negro 1999- Suai, ohin.
Autoridade ne’e dehan katak, komerasaun loron importante ne’e sei iha atividade lubuk ida hodi fó onra ba martir no eroi sira.
“Ita fó onra ba martir no eroi sira no ita kompromitidu bainhira tinan oin mós hakerek istóriu ka livru ba Masakre Setembru Negro 1999 ne’ebé martir na’in-134 inklui Padre tolu mak lakon vida iha masakre referidu.
Prezidente Autoridade Munisípiu Kovalima dehan: “Razaun presiza hakerek istória pesoál atu husik hela ba jerasaun foun sira, se la hakerek bainhira mate istória laiha ona, se mak sei hatutan istória bainhira na’in lakohi hakerek”.
Iha fatin hanesan, Reprezentante Diretór Ezekutivu CNC,I.P, Matias dos Santos reforsa katak, iha ámbitu komemora loron Masakre Setembru Negro 1999 hala’o atividade importante sira hodi fó onra ba martír no eroi sira.
“Ohin, ita mai hamutuk iha ne’e hala’o atividade tratamentu saúde ba sobrevivente sira no mós halo konsulta públiku ba sobrevivente siira,” nia afirma.
Tuir ajenda iha loron 5 Setembru sei hala’o atividade sira hanesan kontinua konsulta públiku no halo diálogu ho vítima sira kona-ba rekonsiliasaun.
Entretantu, iha loron 6 Setembru sei hala’o misa agradesimemtu hafoin CNC fó apoiu umanitária ba vítima vulneravel sira ne’ebé mak laiha kbi’it hamutuk na’in 20.
Notisia relevante: Autoridade Kovalima no sarani sira hala’o prosisaun hodi komemora Masakre Setembru Negro 1999
Jornalista: Celestina Teles
Editór: Florencio Miranda Ximenes
