DILI, 04 Setembru 2025 (TATOLI)—Prezidénsia Repúblika liuhosi Unidade Sosiedade Sivíl no Apoiu Sosiál, foin lalais ne’e, apoia ekipamentu eskolár Ensinu Báziku Filiál (EBF) Don Carlos Filipe Ximenes Belo, SDB iha área Darenafa, Suku Namanei, Postu Kelikai Antiga.
Apoia ne’ebé fó husi Prezidénsia Repúblika kompostu fasilidade eskola no ekipamentu desportu iha-ne’ebé transporta uluk ekipamentu sira hanesan kadeira hamutuk 25 husi totál kadeira 100 no meza 21, sei falta falta 79, husi totál meza no kadeira hamutuk 200.
Aleinde ne’e, kuadru aprendizajen hamutuk 6, komputadór 1, printer 1 no ekipamentu desportu inklui sapatu-roupa iha-ne’ebé inisiativa maihosi Prezidente Repúblika Ramos Horta hodi responde ba proposta eskola referida.
Enkuantu, ekipamentu desportu hetan doasaun husi Prezidente Repúblika nia belun Franklin husi Hong Kong.
“Eskola ne’e iha loos área rurál, tan ne’e presiza tebes fasilidade atu alkansa estudante sira-nia prosesu aprendizajen,” Nuno Horta informa liuhosi nota imprensa ne’ebé TATOLI asesu, Kinta ne’e.
Iha fatin hanesan, Koordenadór Ensinu Báziku Filiál Don Carlos Filipe Ximenes Belo, SDB, Egídio Gusmão hato’o agradesimentu ba apoia hotu husi Prezidente Repúblika maibé kontinua husu ba Governu atu fó-atensaun ba eskola katóliku sira, tanba kontribui mós ba edukasaun no rezisténsia nasionál.
“Ami hakarak Governu tau-matan ba eskola katólika sira hanesan mós Governu tau-matan ba eskola públika sira seluk, tanba sira mós fó kontribuisaun boot ba luta independénsia,” Egídio hateten.
Istorikamente, Eskola EB Don Carlos Filipe Ximenes Belo,SDB iha tempu okupasaun Indonézia koñesidu nu’udar ‘Sekolah Dasar (SD) Darenafa ne’ebé sai fatin istóriku ba luta rezisténsia nasionál.
Aleinde ne’e, eskola ne’e sai mós kapela hanesan realiza misa no sarani iha área Darenafa simu sakramentu liuliu gerrilleiru sira husi ai-laran simu batizmu iha fatin referidu.
Mezmu iha tempu okupasaun militár Indonézia no grupu milísia halo patrullamentu rigorozu iha área referida maibé gerrilleiru sira kontinua hala’o atividade rezisténsia iha eskola referida hanesan Komandante Saudozu Raan-Nakali utiliza hanesan baze kontatu ho juventude iha vila no Komadante Somocho mós tau baze iha fatin ne’e, muda ba rejiaun IV.
Hafoin Timor-Leste hetan independénsia iha tinan-2022, EB Darenafa transforma naran ba EB Don Carlos Filipe Ximenes Belo, SDB nu’udár omenajen ba Laureadu Nobel ba Pás, nu’udar parte husi Eis Bispu Dioseze Dili ninia kontribuisaun ba luta indepedénsia.
Entretantu, Eskola Bázika Filiál Don Carlos Filipe Ximenes Belo, ho totál alunu 256 no profesór hamutuk na’in-8, ne’ebé nu’udár símbolu rezisténsia no esperansa ba foinsa’e sira maibé mós sei hasoru dezafiu iha prosesu aprendizajen nune’e kontinua presiza hetan atensaun husi Governu Timor-Leste.
Jornalista: Natalino Belo
Editór: Xisto Freitas da Piedade
