DILI, 04 Setembru 2025 (TATOLI)—Servisu Rejistu Verifikasaun Emprezariál, Institutu Públiku (SERVE, I.P.) rejista empreza hamutuk 69,926 ne’ebé mak halo ona tratamentu ba Sertidaun Lisensa ba tipu komersiál, hahú husi tinan 2013 to’o Setembru 2025.
Diretór Ezekutivu SERVE, Fausto Dias informa totál empreza 69,926 ne’e kompostu husi empreza internasionál (estranjeiru) hamutuk 5445, empreza lokál (nasionál) hamutuk 25,928, empreza kahur (joint) hamutuk 752 no empreza la espesífiku hanesan kooperativa, ONG no fundasaun hamutuk 37,801, maibé empreza ne’ebé la ativu ona ne’e hamutuk 971.
SERVE, I.P iha ninia papél atu halo rejistu no verifikasaun ba tipu empreza ne’ebé hakarak mai rejistu empreza ho tipu hanesan ENIM, Unipesoál, Lda limitada, Sosiedade Anonim (SA), Empreza Públiku, enkuantu kona-ba lisensiamentu ne’e parte sektorál mak iha kompeténsia fó autorizasaun.
“Maibé komunidade balun konfuzaun ho empreza balun ne’ebé rejista tipu komersiál ida maibé implementasaun seluk fali. Atu dehan de’it katak bainhira emprezáriu ida mai rejistu sertidaun tipu komersiál ami halo verifikasaun de’it, maibé se implementasaun lahanesan ho tipu komersiál ne’e de’it,” Diretór ne’e esplika ba Agência Tatoli iha nia kna’ar fatin, Obrigadu Barack, kuarta (03 Setembru 2025) ne’e.
Nia relata, SERVE rejistu de’it tipu komersiál neen hamutuk 66,628 mak hanesan tipu Individuál Enterprise (ENIN) hamutuk 31,175, UNIPESSOAL LDA hamutuk 27,096, LDA (Limitada) hamutuk 7,681, Sosiedade Anonimu (S.A) hamutuk 112, Reprezentante Permanente (R.P) hamutuk 546 no Empreza Públiku (E.P) hamutuk ualu (8).
“Tanba bazeia ba monitorizasaun husi sektoriál sira, tanba molok atu fó lisensa mós, sira mós orienta ekipa balun hodi ba halo inspesaun. Bainhira ekipa sektorál sira identifika irregularidade nia iha kompeténsia atu fó multa liuhusi baze legál ne’ebé mak iha,” nia dehan.
Enkuantu totál reseita ne’ebé SERVE, I.P arrekada hahú husi fulan janeiru to’o fulan Agostu 2025 hamutuk $351,771,95.
Notísia Relevante: SERVE rejista empreza foun 4.200 iha tinan 2021
Jornalista : Alexandra da Costa
Editór : Cancio Ximenes
