AINARU, 04 Setembru 2025 (TATOLI)—Ministru Obra Públika, Samuel Marcal hateten transformassun moris iha familia ida-nian la presiza hein Governu, tanba Governu fasilita ona merkadu no infranstrutura bázika ba komunidade hodi tulun sira-nia atividade loro-loron no hatene oinsá atu halo jestaun.
Notísia Relevante: Governu lansa amostra sistema teknolojia fibra ba estrada iha Maubisse
“Moris ita-nia uma laran nian ita mak buka rasik, servisu maka’as, faan produtu iha merkadu hodi imi mak dezenvolve rasik imi-nia moris,” Ministru ne’e informa ba jornalista sira iha Rileku, Maubisse, ohin.
Nia dehan, munisípiu Ainaru nia rekursu potensiál barak tebes, nune’e komunidade rasik mak matenek iha ninia jestaun rasik oinsá hodi dezenvolve atu hetan reseita ba família ulan laran liuliu sustenta oan sira ba eskola.
Iha fatin hanesan, reprezentante komunidade Rileku, Júlio Salsinha Barreto hateten saida mak ministru hateten ne’e loos, tanba hanesan povu ki’ik tenke hatene halo jestaun ba nia moris husi rekursu potensiál ne’ebé iha atu labele tane liman demais ba Governu.
“Tanba ne’e, agradese tebes Governu bele fasilita ona estrada ba ami, entaun tulun ona ami hodi lori ami-nia produtu ba faan iha merkadu hodi hetan osan,” nia dehan.
Nia hateten, tanba ema moris iha rai ne’e presiza duni osan no osan mak sai fatór determinante ba transformasaun moris ida-nian, nune’e nia sei esforsu hodi servisu maka’as banati tuir saida mak líder polítika sira ko’alia.
Jornalista : Alexandra da Costa
Editór : Cancio Ximenes
