PA RAEOA ‘rekruta’ asesór rua ba asuntu veteranu no prezervasaun patrimoniál
OEKUSI, 05 Setembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio Servantes Romeia da Cruz Salu, informa, iha mandatu fulan tolu, hahú husi loron 01 Setembru to’o 30 Novembru 2025, presiza asesór rua atu trata asuntu kona-ba veteranu no prezervasaun patrimoniál.
“Ha’u bolu tiha ona. Ha’u-nia asesória na’in-rua ba asuntu veteranu ho asuntu prezervasaun patrimoniál, ida mak Minguel Gama no Costancio Suni, komesa ohin katuas no ferik sira hamriik iha oin, ami tuir, ha’u laiha asesória prinsipál, ha’u-nia asesór prinsipál mak Maun Bo’ot Kay Rala Xanana Gusmão,” nia hateten iha Oekusi, ohin.
Tanba tuir lei númeru 3/2014, alteradu lei númeru 18, iha artigu 4.o, rekoñese de’it, entidade tuteladu no superintendente ba RAEOA mak, Primeiru-Ministru Repúblika Demokrátika Timor-Leste, “Ne’e ha’u ho ami no ita bo’ot sira-nia asesór prinsipál”.
“Iha nível kraik, ita-nia patrimóniu vivu mak ita-nia ferik no katuas sira, tanba ne’e, foin daudaun ami enkontru iha Dili, Maun-Bo’ot Xanana husu ita, nu’udar entidade tuteladu no superintendente iha RAEOA, responsabilidade no garante atu tau buat rua de’it iha ulun – serbi povu no rai, serbi rai no povu, entaun patrimóniu vivu sira-ne’e, atu haree dada oan sira nu’udar jerasaun foun hakat ba oin, ne’e mak objetivu loloos. Ami-nia kna’ar ne’e atu eduka: la’ós edukadór maibé dinamizadór, atu kataliza forsa potensiál, atu dinamiza no kataliza serbisu líder administrasaun públiku sira,” nia hateten.
Notísia relevante:PA RAEOA sei estabelese grupu tékniku aselera podér lokál no desentralizasaun
Entretantu, tuir dokumentu ofisiál ne’ebé Ajénsia TATOLI asesu kona-ba minutas, iha enkontru koordenasaun entre estrutura foun RAEOA ho Komisaun Revizaun Orsamentu (KRO) iha loron 01 Setembru 2025 hala’o iha Ministériu Finansa. Primeiru-Ministru Kay Rala Xanana Gusmão, fó orientasaun klara katak:
Ba kategória saláriu no vensimantu, tenke hala’o ezersísiu interna hodi asegura saláriu to’o fulan-Dezembru no identifika defise ho surplus, reve kontratu no termu referénsia ba funsionáriu kazuál ho nível no la ho nívél (naun-nível).
Nomeasaun polítika, asesór nasionál no internasionál hodi identifika sira-nia atribuisaun esensiál hodi kontribui ba funsionamentu instituisaun to’o loron 31 Dezembru ka lae?. Durante périodu tranzitóriu laiha rekrutamentu funsionáriu foun ho kualker termu kontratu, esepsaun ba serbisu apoiu ba estrutura foun tuir nesesidade, hapara asesória sira hotu tantu nasionál no internasionál.
Durante mandatu folun tolu, presiza asegura serbisu prioridade sira to’o 31 Dezembru, planeamentu no orsamentu tinan-2026, identifika problema difikuldade no aprezenta fila-fali iha loron 07 to’o 11 fulan-Setembru 2025, funsionamentu RAEOA hanesan mós munisípiu sira seluk nu’udar parte integrante husi Timor-Leste no Zona Espesiál Ekonómia Dezenvolvimentu Oekusi Ambeno (ZEEDOA) parte integrante husi RAEOA.
Notísia relevante:PA RAEOA konsidera suspensaun projetu emerjénsia 154 iha Oekusi legál
Jornalista: Abílio Elo Nini
Editór: Rafael Ximenes de A. Belo
