Lidera AMTL, Herculano kontinua reforsa jestaun, hametin parseria no halo advokasia

DILI, 06 setembru 2025 (TATOLI) –Médiku espesialista kardiovaskular Herculano Seixas nu’udar Prezidente hamutuk ho médiku Florindo  Gomes nu’udar Sekretáriu jerál (Sekjer) eleitu hosi membru Asosiasaun Mediku Timor-Leste (AMTL) ho votus maioria hodi lidera AMTL ho mandatu tinan-tolu, périodu 2025-2028.

 “Ha’u sente orgullu, maibé la’ós orgullu individuál iha sentidu ne’e. Maibé, asosiasaun profisionál ida-ne’e bele konsolida nia aan, kada périodu halo kadernizasaun, tranzisaun jerasionál; ne’ebé di’ak hodi promove nafatin lideransa foun sira hodi kontinua hatutan vizaun no misaun asosiasaun nian,” Herculano Seixas dehan ba jornalista sira bainhira ramata votasaun ba lideransa foun, iha salaun Katedrál, ohin.

Autoridade AMTL eleitu ne’e dehan, konfiansa  ne’ebé  membru hotu-hotu sira solisita mai iha ekipa ida tan mak  ne’e estrutura foun sei kontinua reforsa jestaun internál asosiasaun hodi promove nafatin atividade sientífiku no peskiza dezenvolvimentu sira.

“Pakote dahuluk ha’u ho médiku Florindo Gomes atu kontinua hatutan misaun asosiasaun nian, liu-liu prioridade ne’ebé mak ami define iha ami-nia planu sira atu kontinua reforsa jestaun internál asosiasaun nian, promove nafatin atividade sientífika peskiza dezenvolvimentu profisionál no kontinua fó apoiu ba ami-nia membru sira, atu sira bele dezenvolve aan nune’e bele servi di’ak liután ita-nia populasaun sira iha área saúde no hametin parseira no mós kontinua halo advokasia ba ita-nia na’in-ulun sira,” nia relata.

Vizaun no Misaun AMTL sei fó diresaun ba profisionál médiku sira iha Timor-Leste atu servisu ho integridade, kompeténsia, no empatia ba komunidade.

Vizaun AMTL mak Hadi’a sistema saúde Timor-Leste liuhusi profisionál médiku ne’ebé kompetente, étiku, no servisu ba komunidade ho dedikasaun. AMTL hakarak bele hetan sistema saúde ida ne’ebé fó konfiansa ba povo Timor-Leste, ho médiku sira ne’ebé respeita prinsípiu umanitáriu no profisionál.

 AMTL nia misaun mak:

• Reprezenta médiku sira iha Timor-Leste iha nível nasionál no internasionál;
• Promove formasaun kontinuada ba médiku sira atu aumenta kapasidade no kualidade servisu;
• Defende étika médiku no prinsípiu profisionál iha prátika saúde;
• Konsolida solidariedade entre médiku sira atu hadi’a kolaborasaun no troka esperiénsia;.
• Fó kontribuisaun ba polítika saúde liuhusi peskiza, advokasia no partisipasaun iha dezenvolvimentu sistema saúde;

Advoga Governu aprova estabelesimentu Orden Médiku

Nia esplika, kona-ba  prátika di’ak padraun kompeténsia (standard competence) no orden médiku ida-ne’e mak hanoin atu hatutan servisu ne’ebé mak estrutura tuan husik  hela, dezenvolve programa foun karik durante mandatu tinan tolu  nia laran.

“Ami lori asosiasaun hakat tan pasu ida ba oin. Kona-ba planu hanesan ha’u hateten, mai sei define prioridade, depois ami sei reinaun iha tempu-badak atu  haree ami-nia programa sira. Ha’u hanoin prioridade estratéjiku husi ami-nia mandatu mak dahuluk atu halo advokasia ba Governu hodi aprova estabelesimentu orden médiku sira iha Timor-Leste.Tanba orden médiku ne’e importante tebes atu define orden deontolojia ida di’ak ba profisaun médika  no hala’o prátika ho standar (padraun) ho nia kódigu etika sira nune’e presiza define didi’ak,” nia haktuir.

Nia subliña, ezisténsia orden médiku kontinua atu ko’alia ho parseiru estratéjiku liu-liu Ministériu Saúde (MS) atu aselera implementasaun, tanba padraun kompeténsia no kódigu etika profisionál ne’ebé aprova ona iha mandatu estrutura sesante nian, ekipa foun  hakarak kontinua ida-ne’e  no kontínua dezenvolve membru sira liuhusi treinamentu, kapasitasaun no promove mós peskiza iha asosiasaun  médiku nian.

“Ami-nia Estrutura foun mós define prioridade seluk, mak oinsá atu hametin jestaun internál asosiasaun nian atu konsolida di’ak liután asosiasaun. Hanesan asosiasaun ida-ne’ebé mak forte reziliente no bele kontribui di’ak liután ba dezenvolvimentu di’ak liuátan setór saúde iha ita-nia rain,” nia dehan.

Iha fatin hanesan, Vise-Ministru Operalizasaun, Flavio Brandão kongratula estrutura foun eleitu no akonsella  estrutura atu lidera AMTL –  servisu  di’ak liután ba oin.

“Parabéns ba médiku sira ne’ebé mak konsege oferese ema ida-ne’ebé mak di’ak lidera AMTL. Depois Ministériu Saúde konsidera nafatin asaun profisionál hotu-hotu no parseiru estratéjiku Ministériu nian. Ba oin, kolaborasaun sira sei servisu di’ak liután ba asuntu sira ne’ebé mak benefisiu ba pasiente nia moris,” Governante ne’e hato’o.

Nune’e membru AMTL Médiku Alipi Gusmão Lopes, ba esturura foun eleitu, katak iha esperansa pozitivu atu nune’e kontinua bele sai duni AMTL ida-ne’ebé mak fó mahon ba nia membru hotu hodi nune’e bele halo nia papél di’ak liu hodi ba oin.

“Ita hotu  hanesan membru bele fó servisu ne’ebé mak másimu nune’e AMTL bele halo parseiru di’ak ho Governu. Servisu ne’ebé mak AMTL presta hanesan mós servisu ida-ne’ebé bele  ajuda povu ho di’ak liután, tanba AMTL  nia membru kuaze halao kna’ar iha Ministériu Saúde. Espera  katak estrututra foun ne’e bele ezerse  nia funsaun ho di’ak liután,” Alipi hato’o.

Entertantu, iha sesaun votasaun ne’e fahe ba pakote rua  hanesan pakote dahuluk   mak prezidente AMTL ba périodu 2025-2028 mak hanesan  médiku   Herculano Seixas  ho médiku Florindo  Gomes, hanesan sekretariu Jerál AMTL. Pakote daruak mak médiku Raimundo do Santos  hanesan Prezidente ho médika Glaudia Magno, hanesan sekretaria Jerál maibé liuhusi votasaun membru sira hili pakote dahuluk mak manan ho votu hamutuk 122 no pakote daruak ho votu 81.

Jornalista: Felicidade Ximenes

Editór: Rafael Ximenes de A. Belo