DILI, 06 Outubru 2025 (TATOLI)-Movimentu Leitura ba Transformasaun Sosiál ( Movimentu LETRAS ), halo abertura festivál literáriu 2025 edisaun datoluk ho tema “Lee ba Transformasaun Sosiál”, sábadu ne’e iha Fundasaun Oriente.
Eventu ne’e hala’o durante loron tolu 6-8 Outubru ne’e hodi komemora loron internasionál leterásia iha 08 Setembru tinan ne’e.
Koodenadór Movimentu LETRAS, Benito Sanches Sávio, hateten objetivu eventu ne’e nu’udar oportunidade ka espasu estratéjiku ida hodi halibur joven, estudante, labarik no komunidade literária hanesan (bibliotéka, hakerek no lee na’in sira), artista no komunidade tomak. Hodi halo kampaña literária importánsia entre arte no literásia iha Timor-Leste, hodi kontribui ba dezenvolvimentu nasionál.
Nune’e iha atividade ne’e hala’o diskusaun temátika, diskusaun livru, fahe esperiénsia prosesa kreativa, semináriu, feira livru, arte no literatura, expozisaun obra artístika, teatru, lee poezia no seluk tan.
“Ida ne’e mak garante dezenvolvimentu literásia iha Timor, agradese ba {partisipante} sira hotu iha ne’e hatudu katak, ita iha vontade atu kontinua”, Nia hato’o.
Movimentu mai ho mehi kontinua promove no dezenvolve kultura ne’e.
Iha fatin hanesan estudante husi UNTL, Semi Aloesis Tukana no Nelia Prisca, konsidera atividade ne’e importante tebes hodi fanu foinsa’e no sosiedade hodi bele hatoman ho lee livru aumenta koñesimentu.
Enkuantu, Movimentu LETRAS hanesan movimentu literária ne’ebé hakarak promove leitura no dezenvolvimentu diskursu krítiku nian iha área sosiál, kulturál no produsaun koñesimentu nian iha Timor-Leste.
Atu atinji objetivu hirak ne’e liuhusi atividade hirak hanesan kampaña leitura (okupa jardin), klínika hakerek, diskusaun, formasaun, programa oras ida ho livru.
Aliende publikasaun no loke biblioteka ba públiku.
Jornalista: Nelson de Sousa
Editór: Rafael Ximenes de A. Belo
