MOP observa konstrusaun moru protesaun ba mota Lomea-Zumalai
DILI, 08 Setembru 2025 (TATOLI)—Ministru Obra Públika, Samuel Marçal hamutuk ho ekipa, sesta ne’e, halo observasaun ba projetu konstrusaun moru protesaun ba mota Lomea ne’ebé ligasaun Suku Beko ho Zumalai iha Postu Administrativu Zumalai, Munisípiu Kovalima.
“Entaun mota ne’e konsege nakfera no estraga buat hotu-hotu iha parte Zumalai nian, tanba ne’e tinan ida-ne’e ita halo tiha moru protesaun. Mota iha Zumalai ne’e imi hotu hatene katak bainhira tempu udan sempre akontese dezastre naturál,” Ministru Obra Públika, Samuel Marçal, informa ba jornalista sira hafoin ramata reuniaun Konsellu Ministru, iha Palásiu Governu, ohin.
Nia dehan, nia parte hirus uitoan ba empreza tanba tuir loloos ne’e sira konstrui uluk iha parte leten la’ós kontrui uluk fali husi parte kra’ik nian, tanba ne’e nia mós orienta ona ba empreza atu aproveita iha tempu bailoro ne’e bele finaliza tiha konstrusaun moru iha parte leten nian.
“Nune’e, bainhira udan monu rai mak konstrusaun seidauk finaliza mós bele salva ponte ne’e. Ne’ebé, ida-ne’e mak ita-nia objetivu tenke halo supervizaun maka’as,” nia esplika.
Aleinde ne’e, nia hatutan, Primeiru-Ministru mós hakarak servisu ne’e aselera lalais maibé labale implementa obra arbiru maibé tenke ho kualidade, tanba osan ne’e povu ki’ik sira-nian ne’ebe gasta mós ho kuidadu.
“Ne’ebé, obra ne’e implementa ba benefisiu povu nia presiza, entaun halo ho kualidade no antes dezembru kompañia tenke entrega ona ba Governu,” nia dehan.
Enkuantu obra ne’e fahe ba pakote haat no implementa husi kompañia Montana Diak ho montante $3,024.765.07, Sanford Construction ho montante $2,091.591.36, Super Jaya Unipessoal, Lda, ho montante $1,968.158.32 no Meteor Unipesoál, Lda, ho montante 2,842.709.19 ho durasaun tempu tinan ida ho balun.
Jornalista : Alexandra da Costa
Editór : Cancio Ximenes
