Parókia Sagrado Coração de Jesus preparadu partisipa misa selebrasaun vizita Papa Francisco iha Timor-Leste
DILI, 08 Setembru 2025 (TATOLI)—Igreja Parókia Sagrado Coração de Jesus Vila Nova Baukau preparadu hodi partisipa misa asaun ba grasa hodi selebra vizita tinan-ida Sua Santidade Maktoban Papa Francisco iha Timor-Leste.
Pároku Parókia Sagrado Coração de Jesus, Pe. Benediktus Random esplika hafoin simu karta sirkulár husi Konferénsia Espiskopál Timorense (CET-sigla portugeza), parte responsavel parókia liuhosi Vigáriu Jerál Parokiál hala’o kedas preparasaun hanesan fó-sai avizu ba sarani iha Vila Nova hodi halo rejistu bainhira iha interese partisipa selebrasaun misaun iha Tasi-Tolu, loron-10 Setembru ne’e.
“Ha’u fó ona orientasaun atu responsavel sira iha parókia halo preparasaun ba misa asaun ba grasa Sua Santidade Papa Francisco ninian vizita iha Timor-Leste,” Paróku Sagrado Coração de Jesus Vila Nova informa ba TATOLI liuhosi telefónema, Segunda ne’e.
Notísia relevante: Igreja kontinua prepara misa selebrasaun aniversária vizita Papa Francisco iha TL
Padre Random relata katak seidauk fixa totál sarani ne’ebé atu partisipa misa iha Tasi-Tolu maibé garante katak sarani husi parókia referidu nafatin lembra Papa Francisco nune’e sei hola-parte mezmu la to’o tuir numéru rihun 6-resin ne’ebé antes ne’e partisipa iha tinan-2024.
Padre Random salienta maski Papa Francisco husik hela ona mundu maibé ninia mensajen sei nafatin fresku iha memória sarani sira-nian liuliu iha Tasi-Tolu katak labele husik ema li’ur atu estraga kultura Timor-Leste tanba fiar Katólika sai ona kultura iha timoroan hotu nia moris nune’e presiza kuida no kontinua ba futuru.
“Memória ida-ne’e mak sei fresku iha sarani Katólika nia hanoin,” Padre Random haktuir.
Entretantu, tuir oráriu ne’ebé fó-sai misa asaun ba grasa sei hala’o iha Esplanada, Tasi-Tolu, Dili, ne’ebé sei prezide husi Arsebispu Dioseze Dili, Don Virgílio Kardeál do Carmo da Silva, SDB purvolta 18:00 Otl.
Jornalista: Natalino Belo
Editór: Xisto Freitas da Piedade
