DILI, 08 Setembru 2025 (TATOLI)–Polísia Nasionál Timor-Leste (PNTL) liuhusi Diresaun Nasionál Investigasaun Kriminál halo ona identifikasaun ba suspeitu na’in-haat ne’ebé envolve konfrontu iha área Markoni Aldeia O4, Suku Fatuhada, iha Domingu (07/09), ne’ebé rezulta lampu tolu iha Embaixada Kambódia rahun.
Suspeitu na’in-haat ne’e kompostu husi LM, OdCX, AP no EdC.
“Kazu ne’e rasik ho prosesu NUC: 0282/25. PNSIC (Polísia Sientífika no Investigasaun Kriminál) no suspeitu sira daudaun ne’e detein ona iha sela detensaun Eskuadra Dom Aleixo ho oras 72 molok submete ba interrogatóriu dahuluk iha Tribunál Judisiál Primeira Instánsia Dili,” referidu nota ne’ebé Ajénsia TATOLI asesu, Segunda ne’e.
Notísia relevante : Insidente iha Embaixada Kambódia laiha impaktu ba relasaun bilaterál
PNTL detein suspeitu sira ho situasaun Flagrante-Delitu no promove ho krime ne’ebé sira komete hanesan Danu Simples, ne’ebé previstu no punidu iha artigu 259 husi Kódigu Penál Timor-Leste.
Hafoin Diresaun Nasionál Investigasaun Kriminál halo identifikasaun ba suspeitu na’in-haat ne’e, Polísia mós rekolla evidénsia sira hanesan katana ida, viska ida, fatuk no lampu mutin ida hodi sai hanesan evidénsia hodi submete ba investigsaun.
Jornalista Ajénsia TATOLI tenta komunika Diretór Nasionál Investigasaun Kriminál, Superintendente Polísia João Belo dos Reis, hodi fó nia deklarasaun balun kona-ba kazu referida maibé seidauk bele fó resposta.
Jornalista : Natalino Costa
Editora : Julia Chatarina
