DILI, 08 Setembru 2025 (TATOLI)—Governu liuhusi Sekretária Estadu Formasaun Profisionál no Empregu (SEFOPE) ofisialmente anúnsiu vaga online ba programa Empregadór Seasonal Rekoiñesidu (RSE) ba joven sira atu ba servisu iha Nova Zelandia.
“Husu ba foinsa’e sira hotu atu uza oportunidade ida-ne’e ho di’ak. Hatudu ita-boot sira-nia abilidade no hatudu ita-boot sira-nia kompeténsia inklui kualifikasaun atu nune’e bele responde ba merkadu traballu iha Nova Zelándia,” Sekretáriu Estadu Formasaun Profisionál no Empregu (SEFOPE), Rogério Araújo Mendonça, hateten ba jornalista sira liuhusi konferénsia imprensa ne’ebé hala’o iha edifisiu SEFOPE, Kaikoli, ohin.
Nia dehan, kona-ba kuantidade traballadór seidauk fixu tanba sei hein empregadór sira mai husi Nova Zelandia iha fulan-Outubru mak foin bele hatene presiza traballadór hira mak atu ba servisu iha faze dahuluk.
“Traballadór sira-ne’ebé sei ba servisu iha Nova Zelándia ho durasaun fulan-neen (6) ka hitu (7), tanba ne’e pilotu dahuluk iha vaga ne’e hotu-hotu iha direitu atu aplika laharee ba verry poor no verry good ne’e lae, maibé eliminasaun sei bazeia ba esperiénsia no dokumentus rasik husi aplikante sira,” nia esplika.
Rogerio hateten, iha faze dahuluk fó liu prioridade ba traballadór hirak ne’ebé iha kualidade servisu di’ak atu atrai empregadór sira hodi loke dalan ba timoroan hotu hodi ba servisu iha nasaun referidu.
“SEFOPE hakarak loke vaga ne’e ho modelu rua mak online no manuál, tanba ita hatene katak joven foinsa’e sira agora ne’e barak mak la asesu telefone android. Maibé, tanba ita tenke prepara kondisaun di’ak ho sistema bainhira empregadór Nova Zelándia husu fasil bele deteta,” Governante ne’e dehan.
Iha fatin hanesan, Diretór Diresaun Nasionál Empregu Estranjéiru SEFOPE, João Correia Pereira, hateten Programa RSE ba Nova Zelándia estabelese atu fó apoiu ba nesesidade traballadór seasonál sira iha indústria, ortikultura no vitikultura Nova Zelándia nian, enkuantu mós fornese oportunidade empregu temporáriu ba traballadór sira husi nasaun parseiru illa Pasífiku sira no mós Timor-Leste.
“Nune’e, ami enkoraja tebes ita-boot sira atu lee didi’ak informasaun no rekezitu sira hotu molok hahú íta-boot nia aplikasaun. Ida-ne’e sei ajuda asegura katak ita-boot komprende kritériu elejibilidade nian no iha dokumentu suporta hotu-hotu ne’ebé prontu ona,” nia dehan.
Nia hatutan, períodu aplikasaun sira ba programa RSE sei loke husi loron 08-12 fulan-Setembru 2025.
Iha oportunidade ne’e, nia husu ba aplikante sira atu haree kritéria ho didi’ak antes manda aplikasaun ba vaga online tuir tempu ne’ebé termina ona.
“Ami enkoraja no husu ita-boot sira iha vontade atu rejistu mós iha programa RSE bele haruka karta espresaun interese ida liuhosi aplikasaun e-mail no husu atu pasiénsia no koko fila-fali, bainhira halo rejistrasaun online ba iha sistema programa RSE. Link ne’ebé ita-boot sira asesu ba, iha problema ka la’o neineik (loading) ho razaun ba aplikasaun iha nia limitasaun ba asesu,” nia hateten.
Kondisaun Importante sira ba aplikasaun Online Programa RSE;
*Tenke sidadaun Timor-Leste.
* Aplikante sira tenke iha entre tinan 21 ba leten.
* Aplikante tenke iha lisensiatura/Diploma Inglés ka sertifikadu lian Ingiés.
* Empregu tuir Programa RSE ho nia durasaun ba fulan-neen (6) to’o fulan-hitu (7), hafoin kompleta períodu ida-ne’e, ita-boot sira tenke fila mai Timor-Leste maizumenus durante fulan-haat (4) molok ita-boot elizivél ba kontratu seluk (mobilizasaun tuir mai).
* Servisu limita ba ortikultura no vitikultura de’it, laiha tipu empregu seluk ne’ebé mak permite tuir vistu RSE ne’e.
* Servisu iha Nova Zelandia mínimu oras 30 iha kada semana, ka oras 30 módia kada semana durante semana haat (oras 120 kada fulan).
* Aplikante tenke prepara-an ba temperatura oioin, husi besik 7°C iha tempu Invernu (Jullu) to’o besik 34°C iha tempu Veraun.
* Remunerasaun, taxa saláriu atuál ba traballadór RSE sira-nia mínimu mak NZD $23.15 kada oras.
Ezijénsia Fíziku sira:
Ita-boot tenke bele foti no lori ai-fuan no modo sira-ne’ebé mak todan. Envolve servisu repetitiva sira hanesan dobrada/hakruuk, hili/ku’u no tesi/koa. Tanba ne’e presiza nivél kondisaun fíziku ne’ebé di’ak (saudavél) atu bele hala’o ezijénsia sira serbisu nian.
Dokumentu sira-ne’ebé presiza (rekizitu) hotu-hotu tenke submete (upload) ho versaun dokumentu iha PDF no koloridu:
* Pasaporte: Ita-boot nia pasaporte tenke válidu pelumenu fulan-neen ba leten.
* Sertifikadu rejistu kriminál ne’ebé válidu (ho versaun Lian Inglés).
* Sertifikadu Lian Inglés/Diploma
* Kartaun Evidénsia husi SEFOPE
* Billete Identidade (BІ)
* Kartaun Eleitorál (KE)
* Sertifikadu Vasinasaun COVID-19
* Sertidaun RDTL (Birth Certificate)
* Foto Perfíl Kompletu (whole body/seluruh badan)
- Opsionál, bele mós submete/upload Kartaun Lisensa Kondusaun Kareta nian (ho kategória B1/B2–C1/C2,) ne’ebé válidu hanesan identifikasaun adisionál.
Alende ne’e, SEFOPE liuhusi Diresaun Nasionál Empregu Estranjéiru, sei la halo atendementu ba rejistu manuál, aplikasaun hotu-hotu tenke halo ho online ka liuhusi e-mail no link ne’ebé fó sai ona.
Jornalista : Alexandra da Costa
Editór : Cancio Ximenes
