VIKEKE, 08 Setembru 2025 (TATOLI)—Akontesimentu udan boot iha loron Sábadu kalan (06/09) to’o agora, estraga agrikultór sira-nia hare ba époka 2025, iha Postu Administrativu Uatulari, Munisípiu Vikeke.
“Ami-nia hare sei rai hela iha natar laran, atu lalin, maibé udan hela de’it. Agrikultór balun nian ko’a hotu seidauk sama tanba agora udan hela de’it. Ida-ne’e difikulta agrikultór sira iha tinan ida-ne’e,” António Pinto hateten ba TATOLI, iha Postu Administrativu Uatulari, Segunda ne’e.
Nia dehan, bainhira udan beibeik bele afeta ba hare sira-ne’ebé sei iha natar laran no bele moris fali.
Iha fatin hanesan, Koordenadór Estensionista Postu Administrativu Uatulari, Francisco Tilman Belo rekoñese daudaun ne’e mudansa klimátika (udan) afeta tebes ba agrikultór sira-nia hare ne’ebé sei iha natar laran.
“Akontese udan ne’e natureza. Ita labele halo buat ruma. Ita atensaun nafatin bainhira ita-nia agrikultór sira husu ajuda lalin hare. Ita sei halo pedidu ba munisípiu hodi apoiu tratór boot. Maibé, agora ita seidauk halo pedidu tanba agrikultór sira-nia hare seidauk sama hotu no dalan ba natar laran seidauk iha,” nia haktuir.
Nia hatutan hare ne’ebé udan kona ona ne’e, aban-bainrua agrikultór sira prepara fini mós balun moris no balun sei la moris.
“Ida-ne’e afeta mós hare sira-ne’ebé prepra ba fini. Ne’ebé, agrikultór sira kuandu prepara ba fini tenke habai hare ho di’ak mak rai. Se lae aban-bainrua atu kari fali ne’e hare labele moris tanba udan-been kona ona hare,” nia esplika.
Tuir dadus, natar iha área Postu Administrativu Uatulari iha ektare 1.000-resin ne’ebé daudaun ne’e iha faze kolleta.
Jornalista: Vitorino Lopez da Costa
Editór: Xisto Freitas da Piedade
