Ekipa ESGP Suai sai vensedór iha kompetisaun jogu futsal femenina
KOVALIMA, 09 Setembru 2025 (TATOLI)– Ekipa femenina husi Eskola Sekundáriu Jerál Públiku (ESGP) Suai sai vensedór iha kompetisaun jogu futsal komunitária ne’ebé organiza husi PNTL Kovalima no hetan apoia finanseira husi The Asean Foundation.
Okupa segundu lugar mak ekipa husi Eskola Sekundáriu Katólika Ave Maria, ekipa husi Eskola Kafé mak sai vensedór datoluk no Eskola Sekundáriu Jerál Públiku Suai filiál Salele mak sai vensedór da-haat iha kompetisaun jogu futsal femenina desportu komunitária.
Vensedór dahuluk hetan prémiu piala ida ho osan $500 inklui uniforme, vensedór ba daruak hetan prémiu osan piala ida ho osan $350 no uniforme, vensedór datoluk hetan prémiu piala ida ho osan $250 no uniforme, enkuantu ba vensedór datoluk hetan prémiu piala ida ho osan $200 inklui uniforme.
Kompetisaun jogu futsal femenina ne’e partisipa husi klubu 12 entre eskola sekundáriu no tékniku vokasionál ne’ebé hahú jogu iha loron 18 Agostu no finaliza iha loron 9 Setembru ne’e .
Alende ne’e,entrega prémiu no sertifikadu apresiasaun ho osan $100 ba jogadór husi Ensinu Sekundáriu Jerál Ave Maria Suai, Martinha Anito Belosai sai mellor markadora no mellor eskore 23 durante tuir kompetisaun jogu komunitária.
“Realiza desportu komunitária ho objetivu atu promove feto sira nia talentu iha jogu futsal, oinsá haree ba situasaun rai laran liuhusi desportu komunitária hodi ita bele halo prevensaun ba konflitu sira iha ida-idak nia munisípiu sira”, dehan Komandante Jerál PNTL, Superintendente Polísia Joni Viana ba jornalista sira hafoin entrega prémiu ba manan-nain sira, iha Kovalima.
Iha biban hanesan, Reprezentante Prezidente Autoridade Munisípiu Kovalima, Filomeno Cardoso, agradese ba Polísia Nasionál Timor-Leste hamutuk ho parseiru iha inisiativa realiza atividade desportu komunitáriu futsal femenina nivél ensinu sekundáriu
“ Atividade desportu komunitariu ne’e atu hakribi violénsia hodi mantein pás no estabilidade, nune’e ita Kovalima presiza hakmatek, nune’e foku ba dezenvolvimentu nasionál,” nia afirma.
Entretantu, Mellora markadora no mellora eskore 23, Martinha Anito Belo, sente kontente bainhira partisipa iha jogu komunitária futsal femenina nia rasik no esforsu hodi bele sai mellor jogadora no mellór eskore
“Ha’u sente kontente tanba ha’u bele sai mellór jogadora no mellór eskore tanba ha’u nia preparasaun hahú eskola iha Eskola Báziku Centrál to’o ona iha ensinu sekundáriu ha’u bele sai mellór jogadora no mellór eskore” nia konta.
Jornalista: Celestina Teles
Editór: Florencio Miranda Ximenes
