DILI, 09 Setembru 2025 (TATOLI)—Ekipa konjunta, Tersa ne’e, halo apreensaun ba ró Tong Yang Fui Rui ne’ebé tula matériál konstrusaun husi Vietname mai Timor-Leste, ne’ebé antes ne’e atu deskarrga iha Portu Tibar maibé tanba laiha dokumentu viajen maka Autoridade la autoriza halo deskarregamentu.
Ekipa konjunta kompostu husi Diresaun Investigasaun Kriminál (DIK) Nasionál, Unidade Polísia Maritima (UPM), Forsa Komponente Navál no Autoridade Aduaneira (AA)/Alfándega.
Kapitaun Portu Dili, Kapitaun Tenente Raul Correia, haktuir, ekipa konjunta halo apreesaun ba ró tanba de’it laiha bill of lading (BoL).
“Ró kargu ida Tong Yang Fui Rui atu deskarga sasán konstrusaun hanesan simente iha Portu Tibar, maibé dokumentu laiha no la informa ba Portu Tibar,” Kapitaun Tenente Raul Correia Raul relata ba Jornalista sira, iha Portu Dili.
Notísia relevante : Ró Ambulánsia sei halo hikas operasaun Dili-Ataúru iha semana oin
Ró ne’e husi Vietname to’o Portu Tibar iha Sesta (05/09) foin lalais ne’e. Nune’e, iha Tersa (09/09) tuku 12:00, Autoridade Portu Tibar kontaktu ba Polísia hamutuk ho Autoridade Marrítima Nasionál ne’ebé destaka iha Portu Dili no Alfándega hodi lori ró ne’e halo identifikasaun nune’e bele hatene sasán iha ró laran.
Iha prosesu ne’e, ekipa konjunta konsege asegura na’in ba ró, Tong Yang Fui Rui, ne’ebé nu’udar xineza ida-ne’ebé hela iha Timor-Leste.
Kapitaun Portu Dili esplika, tuir prosedimentu bainhira ró ida atu tama iha Portu, entaun nia tenke iha ona bill of lading no komunika kedan parte Autoridade Portu no Alfándega hodi nune’e autoridade atu haree sasán sira ne’ebé ró ne’e tula, maibé ba kazu ne’e ró ne’e laiha bill of lading.
“Entaun depoizde ida ne’e ami halo konfirmasaun ho Portu Tibar katak ró referidu laiha bill of lading. Tanba laiha mak Alfándega la autoriza nia atu hatún sasán iha Portu Tibar,” nia katak.
Hafoin ekipa konjunta halo tiha konfirmasaun ho Diresaun Nasionál Transporte Marrítima no Autoridade Portuária Timor-Leste, katak ró ne’e iha dokumentu maibé nia iha problema iha sasan.
“Tanba ida-ne’e mak ami solisita halo inspesaun konjunta ida entre, Alfándega no UPM oinsá atu halo konfirmasaun ba informasaun ne’ebé mak ami simu,” nia tenik.
Raul hatutan, kuandu autoridade idaidak halo ona inspesaun ba ró ne’e maka husi rezultadu, Alfándega sei foti medida, maibé provizóriamente autoridade seidauk bele toma medida tanba sei hein rezultadu inspesaun no investigsaun, ne’ebé autoridade idaidak sei halo bazeia kompeténsia ne’ebé atribui ba sira.
“Ró agora ami dirije ona husi Portu Tibar mai iha Portu Dili nune’e atu halo inspesaun ba ró ne’e, sasán saida saida mak nia lori, haree ró ne’e nia dokumentu no halo investigsaun. Kuandu haree mak sasán sira ne’ebé ró ne’e tula la tuir kritéria Alfándega mak sei fó sansaun,” nia hato’o.
Tuir obrservasaun Jornalista Ajénsia TATOLI iha terrenu, nota katak bainhira ekipa konjunta halo tiha verifikasun ba dokumentu ró Tong Yang Fui Rui, nota katak laiha númeru Maritime International Organization (MIO) hodi fó lisensa operasaun iha tasi.
Daudaun ekipa konjunta asegura ona dokumentu ró no aban ekipa sei kontinua halo prosesu investigasaun ba ró ne’e.
Jornalista : Natalino Costa
Editora : Julia Chatarina
