TJPI Suai aplika prizaun preventiva ba Xinés na’in-rua utiliza osan falsu iha Bobonaru
KOVALIMA, 08 Jullu 2026 (TATOLI) – Tribunál Judisiál Primeiru Instánsia (TJPI), Suai liuhusi julgamentu Primeiru Interrogatóriu aplika medida koasaun prizaun preventiva Xinés na’in-rua ne’ebé uza osan falsu hodi sosa sasan iha Munisípiu Bobonaru.
Kazu osan falsu ne’e deteta iha loron 27 Juñu no iha momentu ne’e autoridade seguransa detein suspeita na’in ho evidénsia ka kaer nota dollar orijinál ho valór $2.900 ho nota valór $100 hanesan ne’ebé uza sosa sasan inklui osan tahan ualu inklui mós moeda rupiah husi Indonézia no nasaun seluk tan.
“Iha prosesu julgamentu primeiru interrogatóriu ba sidadaun Xinés na’in-rua ho inisiál WZ ho L uza osan falsu hodi sosa sasan iha munisípiu Bobonaru ne’e Tribunal aplika medida koasaun prizaun preventiva”, Defensór Públiku, Jonas Henrique, ba TATOLI, I.P iha TJPI Suai, ohin.
TJPI aplika ona medida koasaun prizaun preventiva hodi kontinua hala’o prosesu investigasaun hodi hein Ministériu Públiku (MP) hala’o nia servisu investigasaun kle’an kona-ba Xinés na’in-rua nia aktu krime ne’e.
Kazu arguidu Xinés na’in-rua utiliza osan falsu ne’e prevista iha kodigu penál artigu 308 kona-ba sirkulasaun osan falsu ne’ebé aplika medida koasaun prizaun preventiva adekuadu, maibé defeza sei haree iha posibilidade halo rekursu.
Audénsia julgamentu ne’e preside husi Juiz Samuel Paixeco, Prokuradór Afonso Lopez no arguidu sira hetan asisténsia legál husi Defensór Públiku, Jonas Henrique.
Jornalista:Celestina Teles
Editór:Florencio Miranda Ximenes
