KDESTO sensibiliza informasaun kona-ba direitu EhD ba estudante sira iha Kovalima
KOVALIMA, 09 Setembru 2025 (TATOLI) – Klibur Dezenvolvimentu Sustentavél Timor-Oan (KDESTO), tersa-ne’e, sensibiliza informasaun kona-bá direitu Ema ho Defisiénsia (EhD) ba estudante sira husi Eskola Sekundáriu Jerál Públiku (ESGP ) Suai.
“ Ita hala’o edukasaun sívika, ohin hahú iha eskola Sekundáriu Públiku Suai kona-ba direitu ba ema ho defisiénsia (EHd)”, dehan Diretór Ezekutivu KDESTO Kovalima, Alfredo dos Santos, ba jornalista sira, iha salaun ESGP Suai, ohin.
Razaun sensibilizasaun ne’e, nia dehan tanba EhD barak sei hela iha kotuk no dala ruma joven sira bele halo diskriminasaun ba sira-nia iha eskola Bázika Sentrrál to’o iha ensinu Sekundáriu Jerál no ensinu Tékniku vokasionál.
Nune’e, KDESTO hakarak sosializa informasaun hodi bele hasa’e alunu no profesor sira-nia koñesementu, nune’e halo prevensaun hodi labele hamosu diskrimasaun ba nia maluk joven EhD iha eskola.
Tuir planu atividade sosializasaun informasaun kona-ba direitu ema ho defisiénsia (EdH) sei hala’o iha Eskola Sekundáriu Jerál Públiku Suai, Eskola Sekundáriu Ave Maria Suai, Kafé, Ensinu Tékniku Vokasionál Kristál no EBC Ogues.
Iha fatin hanesan, Reprezentante Diretór ESGP Suai, Bernardino Caunan, reforsa katak alunu sira presiza rona informasaun kona-ba direitu ba ema ho defisiénsia ni’an, nune’e iha eskola sira estudante labele hamosu diskriminasaun
“Ho nune’e, ha’u husu alunu sira atu partisipa atividade sosialiasaun, nune’e labele hamosu diskriminasaun ba nia maluk EhD sira iha eskola”, nia afirma.
Jornalista: Celestina Teles
Editór: Florencio Miranda Ximenes
