Komunidade Beko husu MAPPF normaliza irrigasaun hodi hasa’e produsaun hare
KOVALIMA, 09 Setembru 2025 (TATOLI)—Reprezentante Komunidade Gala, Rogério Ribeiro, husu Ministériu Agrikultura Pekuária Peskas no Floresta atu normaliza irrigasaun iha aldeia Gala, Suku Beko, Postu Administrativu Suai, Munisípiu Kovalima hodi hasa’e produsaun hare no garante kualidade setór agrikultura iha nivél aldeia.
“Ami iha ne’e presiza Governu atu normaliza irrigasaun tanba ami-nia natar iha ne’e kuaze 150 hektares mak abandonadu durante tinan barak nia laran”, tenik komunidade Rogeçério Ribeiro ba Agênsia Tatoli iha ámbitu seremónia inagurasaun eletrisidade iha aldeia Gala, suku Beco, postu-administrativu Suai, munisípiu Kovalima, sesta (05/09/2025) foin lalais ne’e.
Abitante ne’e hatutan, ho volume bee-mota ne’ebé ho volume barak mak estraga ona natar sira-ne’e tanba ne’e presiza Governu kria moru protesaun, nune’e bele asegura bee-mota nia volume no komunidade bele kontinua asesu ba natar.
“Kleur ona ami la halo natar taNba laiha iRrigasaun no moru protesaun, entaun rai ne’e abandonadu no Ministéria Agrikultura mós latau matan mai am. Naske tinan kotuk ministru mai halo vizita ona, maibé to’o agora seidauk iha resposta ba preokupasaun ne’ebé ami hasoru iha ne’e,” nia informa.
Ministru Agrikultura, Pekuária, Peskas no Floresta (MAPPF), Marcos da Cruz, hateten tinan ne’e MAPPF sei halo irrigasaun iha ne’eba tanba uluk MAPPF ba vizita ona fatin ne’e, no irrigasaun ne’e sei halo odamatan rua mak ida parte liman-loos sei permite ba aldeia Maukola no odamatan iha liman-karuk sei permite ba aldeia Leoualu.
“Ida-ne’e irigasaun boot no ita sei halo. Daudaun ne’e, prosesu iha Komisaun Nasionál Aprovizionamentu (CNA). Bazeia ba orsamentu, tuir kalkulasaun tékniku nian ne’e sei aloka miliaun $16. Maibé, ita seidauk hatene montante loloos tanba ita seidauk asina kontratu,” nia dehan.
Jornalista : Alexandra da Costa
Editór : Cancio Ximenes
