PNTL preparadu asegura misa agradesimentu tinan-ida vizita Papa Francisco
DILI, 09 Setembru 2025 (TATOLI)—Polísia Nasionál Timor-Leste (PNTL) preparadu atu fó seguransa ba misa agradesimentu tinan-ida vizita Sua Santidade Papa Francisco mai Timor-Leste, ne’ebé ajendadu misa sei realiza iha Kuarta (10/09) tuku 18:00, iha Tasi-tolu.
Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes hateten, Komandu Munisípiu Dili simu ona orientasaun husi Komandu Jerál.
“Ohin ita halo enkontru, ita breafing ona ba membru sira, aban ita hotu sei apoia másimu iha Tasi-tolu, atu nune’e selebrasaun ne’e mós la’o di’ak, movimentu ita-nia sarani iha kapitál Dili no sarani sira husi munisípiu seluk ne’ebé mak mai iha kapitál Dili mós la’o ho di’ak no organizadu,” Superintendente Xefe Polísia informa ba Jornalista sira, iha nia knaar fatin, Kaikoli, Tersa ne’e.
Notísia relevante : Igreja kontinua prepara misa selebrasaun aniversária vizita Papa Francisco iha TL
Komandu PNTL Dili hetan apoiu husi Unidade Espesiál, Unidade Polísia Marritima, no Komandu Jerál atu nune’e bele garante seguransa másimu.
Komandante PNTL dehan, daudaun ne’e Komandu identifika parrajen ba sarani sira ne’ebé husi munisípiu atu mai iha Tasi-tolu, liuliu ba sarani husi parte Oeste sira sei mai konsentra iha Pelican Paradise, sarani sira husi parte Leste sei okupa Tasi-tolu parte tasi no Kampu Aeroportu atu nune’e husik dalan luan atu ema no transporte bele halo movimentu bá-mai ho livre.
Nia garante situasaun sei la’o hakmatek durante misa.”Ita hotu Komandu ka ita-nia sarani sira hotu hamutuk atu garante situasaun di’ak.”
Komandante Orlando mós garante katak Polísia sei halo serbisuno kontrola ba movimentu transporte ho di’ak tanba Polísia Tránzitu Dili koordena ona ho Tránzitu Nasionál atu kontrola dalan nune’e transporte bele la’o normál
“Maski transporte motór no karreta ikus-ikus ne’e barak, maibé Polísia nafatin halo ninia serbisu hodi asegura no fasilita dalan sira ne’e, fó espasu atu nune’e transporte sira seluk bele la’o hanesan baibain,” nia katak.
Jornalista : Natalino Costa
Editora : Julia Chatarina
