VIKEKE, 09 Setembru 2025 (TATOLI)—Polísia Nasionál Timor-Leste (PNTL) Munisípiu Vikeke liuhusi Unidade Tránzitu rejista kazu asidente tráfegu hahú fulan husi Janeiru to’o Agostu 2025 hamutuk 14.
Komandante PNTL Munisípiu Vikeke, Superintendente Polísia António Rego Fernandes relata katak husi kazu asidente referidu maioria kazu kamaan, la rejista ema mate ka omesídiu.
“Husi fulan-Janeiru to’o fulan-Agostu ne’e ami rejista kazu asidente tráfegu hamutuk 14. Husi númeru kazu asidente ne’e ita la rejista kazu ema mate no kazu asidente ne’e maioria kamaan,” António Rego Fernandes ba TATOLI iha ninia kna’ar fatin, Beskem, Vikeke, Tersa ne’e.
Komandante PNTL munisípiu Vikeke ne’e hatutan, kazu asidente tráfegu 14 nune’e kazu sira-ne’e vítima no suspeitu sira deside rezolve família tanba kazu asidente la grave.
“Ho kazu asidente tráfegu ne’ebé ami rejista iha Munisípiu Vikeke, bá-oin ami kontinua halo prevensaun ba tránzitu. Husi prevensaun ne’e ami halo patrullamentu, pasa-revista ba utilizadór transporte hanesan karreta no motorizada sira. Nune’e mós halo enkontru komunitáriu atu ita redús kazu asidente tráfegu. Ida-ne’e ami halo rutina atu sidadaun sira bele komprende ba vida seguru nian no liga ba kódigu estrada,” nia subliña.
Aleinde ne’e, nia relata, atividade Unidade Tránzitu Munisípiu Vikeke implementa mak check point ba tranporte sira liuliu karreta no motorizada sira-ne’ebé hala’o movimentu iha kapitál no postu sira.
Nune’e, husi atividade check point ne’e motorista sira-ne’ebé viola kódigu estrada, laiha karta kondusaun no la uza kapasete, Unidade Tránzitu fó multa.
“Husi atividade check point ne’e ita-nia Unidade Tránzitu konsege rekolla koima husi fulan-Janeiru to’o fulan-Agostu hatama ba kofre Estadu ne’e hamutuk $12.573,00,” nia esplika.
Jornalista: Vitorino Lopez da Costa
Editór: Xisto Freitas da Piedade
