BOBONARU, 09 Setembru 2025 (TATOLI)-Sekretaria Estadu Formasaun Profisionál no Empregu (SEFOPE) realiza Feira Kareirra no Edukasaun ba estudante finalista husi Ensinu Sekundariu Jerál no Tekniku Vokasionál sira iha Bobonaru.
Atividade ne’e realiza atu responde ba politika IX Governu, liuhusi SEFOPE ba implementasaun programa investimentu no diversifikasaun ekonómika hanesan programa kriasaun oportunidade serbisu nu’udar ojetivu nasionál ida hodi hasa’e kualifikasaun forsa traballu hodi responde ba dezenvolvimentu ekonomia iha rai-laran.
Sekretáriu Estadu tutela, Rogério de Araújo Mendonça, informa feira ne’e realiza ho objetivu atu tulun estudante sira bele prepara sira-nia abilidade ne’ebé di’ak hodi kapasita sira-nia an liuhusi sentru formasaun no universidade sira, nune’e bele asesu ba oportunidade serbisu iha rai-laran no li’ur.
“Nia objetivu atu divulga informasaun ba estudante sira bainhira remata ona estudu, inan-aman iha finansiamentu bele kontinua ba universidade no eskola iha rai-li’ur. Maibé, maioria mak la kontinua maka oinsá bele asesu ba sentru formasaun akreditadu no sentru formasaun rejistadu no sentru formasaun komunitáriu, nune’e bele hetan empregu ou kareirra ida ne’ebé di’ak, governante ne’e dehan iha Jináziu Maliana, ohin.
SEFOPE liuhusi Diresaun Nasionál Empregu mós bele apoia grupu autoempregu ba ema ne’ebé hakarak kria empregu ba nia-an no grupu.
Aleinde ne’e, Diresaun Nasionál Empregu Estranjeiru iha seksaun barak mak presiza foinsa’e sira nia abilidade, kompeténsia hodi haáan ba merkadu traballu iha rai-li’ur hanesan Austrália, Koreia, Japaun no Nova Zelándia.
“Sira ne’e hotu ita-boot sira tenke partisipa iha formasaun ou treinamentu sira ne’ebé merkadu presiza, tanba ne’e ha’u husu ba imi hotu atu uza oportunidade ne’e ho didi’ak”, nia dehan.
Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, konsidera programa ne’e bele tulun estudante sira hili dalan ba futuru ne’ebé loos.
“Feira ne’e sei fó koñesimentu di’ak ba estudante sira. Ita-boot sira ohin ho aban sei haree saida mak akontese iha ne’e, aprende hodi tau hela iha ita-nia kakutak, tanba atividade sira hanesan ne’e la naran akontese, tanba ne’e aproveita ba hodi kapasita ita-boot sira-nia an”, dehan.
Diretór SEFOPE Delegasaun Territoriál Munisípiu Bobonaru, Leandro Bernardo Vicente, husu ba estudante sira atu partisipa ho di’ak tanba ne’e hanesan oportunidade osan-mean.
“Ohin loron inportante ba imi atu gaña informasaun husi ezibidór sira no sei aprezenta matéria husi oradór sira. Informasaun sira ne’e kuda iha imi-nia laran no rai iha imi-nia hanoin nune’e aban bainrua sei sai útil iha future. Lalika tauk atu avansa ba oin, tanba oportunidade nakloke ba imi hotu, lalika arrepende tanba ita hatene katak arrepende ne’e mai tarde”, nia sujere.
Estudante ne’ebé partisipa iha feira ne’e hamutuk 1.399, kompostu husi feto 624 no mane 777 ne’ebé mai husi eskola 18.
Ezibidór ne’ebé partisipa iha feira ne’e hamutuk 18, kompostu husi instituisaun Governu ualu, ONG ida, empreza públika rua, universidade ida no sentru formasaun neen. Feira ne’e hala’o durante loron rua ne’e gasta rihun $8.
Jornalista: Sergio da Cruz
Editora: Maria Auxiliadora
