DILI, 10 Setembru 2025 (TATOLI)–Bispu Dioseze Dili, Don Virgílio Kardeál do Carmo da Silva, SDB konsidera Tasi-Tolu nu’udár fatin istóriku Timor-Leste (TL) liuhosi vizita Líder Mundiál Igreja Katólika na’in-rua hanesan Papa João Paulo II iha tinan 1989 no Papa Francisco iha tinan 2024.
“Ohin ita hotu halibur hamutuk iha Tasi-Tolu dala-ida tan. Ita rekoñese katak fatin ida-ne’e sasin ona ba eventu istóriku boot rua ne’ebé la’ós de’it hatudu ema Timor nia fiar maibé mós koloka rai Timor ba mapa mundu nian,” Don Virgílio Kardeál do Carmo hateten bainhira sai selebrante misa asaun ba grasa vizita tinan-ida Papa Francisco iha Timor-Leste, iha Tasi-Tolu, Kuarta ne’e.
Kardeál hatutan liuhosi Vizita dahuluk líder Katólika Papa João Paulo II hatudu ba mundu katak povu Timor nu’udár fiar-na’in, unidade ne’ebé hatene luta hamutuk ba auto-determinasaun, iha-ne’ebé husik hela mensajen murak hanesan “Imi mak masin rai nian, imi mak roman mundu nian”.
Don Virgílio esplika liuhosi vizita Papa João Paulo II konsege rezulta Timor-Leste nia ukun rasik-aan.
Notísia relevante: Prezensa Papa Francisco hametin fiar sarani ba Maromak
Enkuantu, eventu istóriku daruak mak vizita Papa Francisco ne’ebé reforsa liután fatin Tasi-Tolu nu’udár reprezenta Timor-Leste nia fiar iha kontinente Ázian nian.
Nia haktuir, Papa Francisco haree hetan roman fiar nian, liuhosi labarik sira-nia fuan, foinsa’e no ferik-katuas sira, iha-ne’ebé naroman Evanjellu nian mak fó roman ba Timor-Leste nia kultura no valór ne’ebé hodi transforma husi laran ba moris ida de’it maibé ho illas timoroan nian rasik.
“Ohin ita hamutuk nu’udár kreda ida hodi hasa’e ba Maromak Santa Misa mak asaun ba grasa ida hodi selebra aniversária dahuluk vizita Papa Francisco nian. Vizita ne’ebé hatudu katak Maromak hanoin no haraik bensaun ba ita, liuhosi prenzensa fraterna Papa Francisco nian,” Don Virgílio Kardeál subliña.
Husi observasaun TATOLI iha terrenu nota, selebrasaun misa asaun ba grasa hodi komemora vizita tinan-ida Papa Francisco iha Timor-Leste hetan entusiazmu husi sarani, padre, madre no relijiozu ne’ebé nakonu ho memoriál iha Kampu Tasi-Tolu, Dili.
Entretantu, Maktoban Papa Francisco vizita Timor-Leste durante loron-tolu, 9-11 Setembru 2024, iha-ne’ebé dirije mós misa iha Tasi-Tolu ne’ebé partisipa husi sarani Katólika rihun 700-resin.
Jornalista: Natalino Belo
Editór: Xisto Freitas da Piedade
