DILI, 10 Setembru 2025 (TATOLI)-Governu aprova projetu dekretu-lei rua ne’ebé aprezenta husi Ministru Administrasaun Estatál, Tomás do Rosário Cabral, kona-ba alterasaun dahuluk ba Dekretu-Lei númeru 84/2023, 23 fulan-Novembru no alterasaun dahuluk ba Dekretu-Lei númeru 3/2017, 22 fulan-Marsu.
Tuir dokumentu Governu ne’ebé Tatoli asesu, alterasaun dahuluk ba Dekretu-Lei númeru 84/2023 loron 23 fulan Novembru, no alterasaun daneen ba Dekretu-Lei númeru 3/2016 loron 16 fulan Marsu, kona-ba Estatutu Autoridade Munisipál no Grupu Tékniku Interministeriál ba Desentralizasaun Administrativa.
Diploma ne’e introdús ajustamentu ba rejime jurídiku ne’ebé daudaun ne’e vigora, liuliu atu klarifika regulamentu no delegasaun kompeténsia sira, fó fleksibilidade boot liu iha ezersísiu funsaun diresaun nian iha situasaun substituisaun, halo revizaun ba lista servisu munisípiu no garante estabilidade no rasionalidade boot liu iha funsionamentu Gabinete Apoiu Tékniku nian.
Iha tempu hanesan, revoga dispozisaun dezatualizada husi artigu 7.º to’o 18.º husi Estatutu Autoridade Munisipál, nomós norma sira husi Dekretu-Lei númeru 84/2023, ho objetivu atu halo kontensaun ba aumentu despeza sira ne’ebé relasiona ho implementasaun husi prosesu desentralizasaun nian.
Aleinde ne’e, halo mós alterasaun dahuluk ba Dekretu-Lei númeru 3/2017, 22 fulan-Marsu, ne’ebé aprova ona Rejime Área Estasionamentu ho durasaun limitada.
Alterasaun normativa ida-ne’e ho objetivu atu esklarese ámbitu territoriál diploma nian, hametin knaar Autoridade Munisipál, Autoridade Administrativa Ataúru no Rejiaun Administrativa Espesiál Oekusi Ambenu nian iha jestaun no fiskalizasaun ba área estasionamentu ho durasaun limitada, nomós estabelese parámetru ne’ebé fleksivel liu kona-ba valór no períodu kobra taxa estasionamentu nian.
Jornalista: Arminda Fonseca
Editora: Maria Auxiliadora
