BOBONARU, 10 Setembru 2025 (TATOLI) –Joven hamutuk 786 iha munisípiu Bobonaru mak submete ona formuláriu ba vaga kadetes foun Polisia Nasionál Timor-Leste (PNTL) tinan 2025.
Komandante Polisía munisípiu Bobonaru, Superintendente Agostinho Gomes da Silva, informa iha inísiu loke vaga iha loron 06 Agostu no termina iha 09 Setembru ne’e rejista ema na’in-1.408 mak foti formuláriu.
“Husi númeru ida-ne’e, konsidera iha altura, idade, iha de’it 786 mak submete filafali formuláriu ne’ebé sira mai foti tuir sira-nia kondisaun ne’ebé iha”, nia informa ba jornalista sira, ohin.
Superintedente Xefe ne’e subliña katak rezultadu ne’e sei aprezenta ba Komisaun Rekrutamentu iha nasionál hodi hein orientasaun atu kontinua ba faze tuirmai.
Tuir orientasaun husi Komisaun Rekrutamentu, teste eskrita sei realiza iha Kuartél Komandu Munisípiu Bobonaru.
Jornalista: Sergio da Cruz
Editora: Maria Auxiliadora
