KOVALIMA, 10 Setembru 2025 (TATOLI) – Komandu Polísia Nasionál Timor-Leste (PNTL), Munisípiu Kovalima, simu ona formuláriu husi joven sira hamutuk 843 ne’ebe konkorre ona ba vaga kadete PNTL foun.
“ Ita hahú loke vaga iha loron 5 Agostu to’o iha loron 12 Agostu to’o 9 setembru, ne’e distribui ona formuláriu hamutuk 1.041 hodi fó oportunidade ba joven sira no na’in-843 mak submete formuláriu kandidatura sira”, relata Komandante PNTL Munisípiu Kovalima, Superintendente Asistente Polísia Inacio Amaral, ba jornalista sira, iha salaun enkontru PNTL Kovalima, ohin.
Husi formuláriu hamutuk 1.041 ne’e na’in-198 mak la konsege hatama la ho razaun no kandidatu na’in-843 mak konsege submete .
Bazeia ba oráriu iha loron 9 Setembru ne’e ensera, nune’e iha loron 10 Setembru ne’e komandante PNTL lori ona dokumentu hirak ne’e ba iha sentru formasaunn PNTL Nasionál atu halo re-verifika dokumentu, nune’e hodi justifika ba sira ne’ebé mak pasa iha selesaun dokumentu atu tuir prosesu prova kulturál.
Tuir planu Komandu PNTL munisípiu Kovalima sei hala’o prova kulturál iha salaun Eskola sekundáriu jerál Públiku Suai ba kandidatu membru PNTL foun ne’ebé pasa iha seleasaun dokumentu.
Komandu PNTL kovalima distribui formuláriu bazeia ba diploma ministeriál ne’ebé aprova, dekretu-lei númeru 17/2025 hodi fó kompeténsia ba komandu jerál PNTL loke konkursu públiku ne’ebé define ona nia kritéria sira.
Polisia Nasional Timor-Leste, distribui formulariu ba joven feto no mane sira ne’ebé maka kandidata aan atu sai membru polisia nasionál Timor-Leste (PNTL), hamutuk 400, Anunsiu publiku ne’e baseia ba diploma ministerial nu 17/2025, 25 junu 2025.
Distribuisaun formulariu komesa loron 05 fulan agostu to’o loron 29 agostu 2025, no submeter dokuemntu hahu loron 12 fulan-agostu no sei termina iha loron 09 fulan-setembru 2025.
Vaga distribuisaun kada munisipiu mak hanesan, Atauro 10, Aileu 20, Ainaro 25, Baucau 40, Bobonaro 40, Covalima 25, Dili 40, Ermera 37, Lautem 27, Likisa 26, Manatuto 25, Manufahi 25, RAEOA 25 no Vikeke 35 ho total 400.
Jornalista: Celestina Teles
Editór: Florencio Miranda Ximenes
