DILI, 10 Setembru 2025 (TATOLI)-Komisaun B iha Parlamentu Nasionál ba asuntu Negósiu Estranjeiru, Defeza no Seguransa, husu autoridade kompetente atu halo investigasaun kle’an ba ró Tong Yang Fui Rui, ne’ebé tula materiál konstrusaun husi Vietname mai Timor-Leste sein dokumentu viajen.
“Presiza investigasaun [atu] hatene motivu”, Prezidente Komisaun B, Augusto Domingos ‘Deker’, hato’o iha Parlamentu, ohin.
Iha parte seluk, Komisaun solisita ba Governu, liuhusi entidade kompetente atu kria kondisaun, liuliu ekipamentu ba Polísia Unidade Marítima, Forsa Komponente Navál hodi kontrola iha tasi hodi haree peska ilegál, tranzasaun droga no atividade ilísitu sira seluk.
Iha 09 Setembru 2025, ekipa konjunta halo apreensaun ba ró Tong Yang Fui Rui ne’ebé tula matériál konstrusaun husi Vietname mai Timor-Leste, ne’ebé antes ne’e atu deskarga iha Portu Tíbar, maibé tanba laiha dokumentu viajen maka autoridade la autoriza halo deskarregamentu.
Kapitaun Portu Dili, Tenente Raul Correia, haktuir ekipa konjunta halo apreesaun ba ró tanba de’it laiha bill of lading (BoL).
Ró ne’e husi Vietname to’o Portu Tíbar iha sesta (05/09) foin lalais ne’e. Nune’e, iha tersa (09/09) tuku 12h00, autoridade Portu Tíbar kontaktu ba Polísia hamutuk ho Autoridade Marítima Nasionál ne’ebé destaka iha Portu Dili no Alfándega hodi lori ró ne’e halo identifikasaun nune’e bele hatene sasán iha ró laran.
Iha prosesu ne’e, ekipa konjunta konsege asegura na’in ba ró, Tong Yang Fui Rui, ne’ebé nu’udar xinés ida-ne’ebé hela iha Timor-Leste.
Hafoin ekipa konjunta halo tiha konfirmasaun ho Diresaun Nasionál Transporte Marítima no Autoridade Portuária Timor-Leste, katak ró ne’e iha dokumentu, maibé nia iha problema iha sasán.
Notísia relevante: https://tatoli.tl/2025/09/09/ekipa-konjunta-halo-apreensaun-ba-ro-tong-yang-fui-rui/
Jornalista: Nelson de Sousa
Editora: Maria Auxiliadora
