DILI, 10 Setembru 2025 (TATOLI)-Governu aprova ona projetu Dekretu-Lei, kona-ba estabelese Rejime ba Promosaun Estraordinária Pesoál Integradu iha Karreira Profisionál Saúde sira iha Administrasaun Públika.
Diploma ne’e ho objetivu atu reforsa motivasaun no valorizasaun karreira profisionál sira-ne’e nian, hodi kontribui mós ba funsionamentu servisu saúde públika ne’ebé di’ak liu, ho hatán ba falta prosesu regulár sira promosaun nian iha setór ne’e.
Rejime promosaun estraordináriu ida-ne’e abranje médiku, enfermeiru, parteira, no tékniku diagnóstiku, terapéutiku, no mós saúde públika, hodi permite sira atu avansa ba kategoria superiór tuirmai liuhusi sistema pontuasaun.
Klasifikasaun ne’e bazeia ba soma pontu ne’ebé fó bazeia ba kritériu objetivu hanesan durasaun servisu, avaliasaun dezempeñu, prestasaun servisu iha área remota, formasaun, asiduidade no komportamentu di’ak.
“Ita halo promosaun ne’e ba sira-nia karreira, katak iha tinan barak nia-laran sira ne’ebé seidauk hetan oportunidade promosaun, ita sei halo promosaun ba karreira profisionál sira ne’ebé serbisu hahú husi tinan haat to’o tinan 10 hamutuk 2.016. Promosaun sei hahú iha fulan-Outubru tinan ne’e ba karreira profisionál saúde sira hotu iha territóriu tomak”, Ministra Saúde, Élia Amaral, informa iha Palásiu Governu, ohin.
Tuir nia, diploma ne’e prevee mós kriasaun dalan promosaun automátiku ida liuhusi rekoñesimentu profisionál ba enfermeiru sira iha kategoria Enfermeiru Báziku, ne’ebé sei avansa ba kategoria Enfermeiru Jerál Júnior B hafoin kompleta formasaun espesífika, ne’ebé sei aprova ho despaxu husi membru Governu ne’ebé responsavel ba área saúde.
Númeru vaga sira ne’ebé sei prienxe no sei fiksa husi Rezolusaun Governu, liuhusi proposta Komisaun Funsaun Públika nian.
Jornalista: Arminda Fonseca
Editora: Maria Auxiliadora
