DILI, 10 Setembru 2025 (TATOLI) – Institutu Nasionál Dezenvolvimentu Mão-de-Obra, Institutu Públiku (INDMO,I.P.) anunsia katak Timor-Leste sei organiza Semana Internasionál Abilidade nian ba daruak, ne’ebé sei realiza entre loron 15 no 19 Setembru 2025.
Eventu ne’e rasik sei realiza iha Sentru Konvensaun Dili (CCD) ho tema “Kompeténsia iha Asaun: Impulsiona Inovasaun ba Integrasaun Globál”.
Diretora Ezekutiva INDMO,I.P, Isabel Fernandes de Lima, esplika objetivu husi eventu ne’e atu foka ba inovasaun no integrasaun globál nian, ne’ebé hatudu kolaborasaun ne’ebé forte, tanba sei iha delegadu internasionál besik 57 husi nasaun 10-resin mak sei partisipa.
“Atividade ne’e ami espera katak ema liu rihun-ida sei marka prezensa iha programa loron lima nian no vizitante atus ba atus sei vizita espasu feira nian. Eventu ne’e sei hala’o mós iha formatu íbridu, ne’ebé fasilita partisipasaun prezensiál no virtuál”, Isabel Fernandes de Lima hateten ohin.
Nia destaka programa sira husi eventu ne’e mak hanesan sei iha simpóziu no sesaun aprendizajen, katak espesialista sira sei fahe koñesimentu kona-ba oinsá uza dadus estatístika ba dezenvolvimentu politika, promove kualidade no formasaun inkluziva, no oinsá adapta sistema formasaun dijitál, mudansa klimátika, no mobilidade traballadór.
Sei iha fórum indústria Technical and Vocational Education and Training (TVET) durante loron rua no formasaun sei halo revizaun no aliña ho padraun kompeténsia nian, atu hametin liután kolaborasaun entre TVET no merkadu traballu.
Aleinde ne’e, sei iha feira teknolojia TVET durante loron haat husi ezibidór liu empreza 20, instituisaun TVET, no organizasaun internasionál sei hatudu inovasaun ne’ebé dezenvolve iha futuru abilidade nian.
Tuir nia, INDMO Timor-Leste sei sai anfitriaun ba Asembleia Jerál WorldSkills Asia ba da-10 iha tinan 2026 no sei hala’o Konkursu Nasionál Abilidade nian iha tinan 2026, ne’ebé sei pozisiona liután nasaun ida-ne’e nu’udar sentru ida ba eselénsia abilidade nian.
Nune’e mós sei iha akordu parseiru katak sei asina memorandu mntendimentu (MoU) rua ho South Australian Skills Commission kona-ba rekoñesimentu abilidade okupasionál no mobilidade traballadór, no seluk ho HRD Corp Malaysia hodi apoia dezenvolvimentu ba Índise Formasaun Nasionál ba Timor-Leste.
Aleinde ne’e, iha mós kolaborasaun internasionál katak enkontru bilaterál ho parseiru lokál sira sei hametin parseiru, enkuantu vizita kulturál no edukasionál sei fó oportunidade ba delegadu sira atu esperimenta eransa Timor-Leste nian.
Dirijente ne’e salienta katak partisipante importante iha eventu ne’e mak Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuadi Lay, ne’ebé sei lansa ofisialmente eventu ne’e, hamutuk ho Ministra ba Edukasaun no Formasaun husi Territóriu Norte Austrália, Jo Hersey, no CEO WorldSkills Asia Fahar, Al Suwaidi, no seluk tan.
INDMO, I.P. konvida sidadaun sira ho laran-metin atu partisipa iha feira ne’ebé loke ba públiku no enkoraja parseiru mídia sira atu halo kobertura ba semana tomak.
“Liuhusi koloka abilidade iha asaun, Timor-Leste bele hamosu poténsia ba ninia juventude, impulsiona inovasaun, no garante futuru ne’ebé prosperu no sustentavel. Mai ita kolabora, fahe koñesimentu, no harii parseiru ne’ebé sei forma ita-nia futuru hamutuk”, konklui.
Jornalista: Arminda Fonseca
Editora: Maria Auxiliadora
