DILI, 10 Setembru 2025 (TATOLI) – Joven timoroan na’in-tolu reprezenta ba dahuluk nasaun iha kompetisaun prestijiada WorldSkills ASEAN 2025 ba da-14, ne’ebé hala’o iha Manila-Filipina, entre loron 20 no 31 Agostu 2025 no sai “Best of The Nations” iha parte kulinária nian.
Partisipasaun ne’e marka Timor-Leste nia estreia istórika iha palku abilidade téknika no vokasionál rejionál. Kompetisaun ne’ebé organiza husi ASEAN WorldSkills, fornese plataforma ida hodi hatudu abilidade husi joven profisionál sira husi nasaun membru ASEAN oioin.
Timor-Leste, liuhusi Institutu Nasionál Dezenvolvimentu Mão de Obra (INDMO), prepara partisipante selesionadu na’in-tolu huis sentru formasaun profisionál akreditadu hodi kompete iha área tolu ne’ebé la hanesan.
Partisipante na’in-tolu ne’e mak: Nenilton de Andrade husi Institutu Teknolojia Dili (DIT) iha kategoria Servisu Restaurante; Fidencio das Neves husi Sentru Nasionál Formasaun Profesionál (CNEFP) Tíbar iha kategoria Soldadura; no Ester Pinheiro husi Sentru Formasaun Profisionál Juventude (STVJ) iha kategoria Koziña.
Objetivu prinsipál husi partisipasaun ne’e mak atu hatudu kapasidade joven profisionál Timor-Leste nian iha nivel ASEAN, promove kultura abilidade no aprendizajen ba moris tomak, hetan insights husi prátika di’ak liu husi nasaun ASEAN, hametin kooperasaun rejionál no avalia dezempeñu nasionál ba melloramentu no planeamentu dezenvolvimentu rekursu umanu iha futuru.
Vise-Primeiru-Ministru, Ministru Koordenadór Asuntu Ekonómiku (MKAE), Francisco Kalbuadi Lay, apresia ba kontijente Timor-Leste ne’ebé ba dahuluk tuir kompetisaun WorldSkills ASEAN ba da-14 iha Manila-Filipina, basá iha kompetisaun ne’e Timor-Leste sai “Best of The Nations” iha parte kulinária nian.
“Ha’u fó parabéns ba ekipa no ba kompetidora Ester Araújo Pinheiro, ne’ebé sai nu’udar “Best Nation Awarding of Timor-Leste”. Ida-ne’e sai hanesan motivasaun boot ida ba imi no timorona hotu”, Francisco Kalbuadi Lay dehan liuhusi nota imprensa ne’ebé Tatoli asesu.
Ekipa ne’ebé lidera husi Diretora Institutu Nasionál Dezenvolvimentu Mão de Obra (INDMO,IP), Isabel Fernandes de Lima, hato’o agradesimentu ba apoiu tomak husi Vise-Primeiru-Ministru durante partisipasaun Timor-Leste nian iha kompetisaun WorldSkills ASEAN iha Filipina.
Isabel Fernandes de Lima salienta kompetisaun ne’e halo dala ida iha tinan rua nia laran. No Timor-Leste bá partisipa iha ne’ebá hodi aprende esperiénsia lubuk ida no ne’e sai hanesan esperiénsia ba sentru treinamentu sira ne’ebé akreditadu iha rai-laran tanba sira aprezenta sira-nia dezempeñu ho di’ak loos.
Tuir nia, Timor-Leste tuir kompetisaun ne’e lori kompetidór na’in-toku ba área cooking, restaurant services nomós welding nian, iha tempu hanesan timoroan sira ne’e mós sai júri iha kompetisaun ne’e.
“Timor-Leste hetan valór ne’ebé aas, nune’e sira ne’ebé hanesan head of delegations, ami kuaze nasaun hamutuk 10, ami na’in hira vota ba iha kada nasaun ema ida, tantu husi Timor-Leste, Ester Araújo Pinheiro mak hetan hanesan Best of the Nations’’, nia esplika.
Vensedora ba kompetisaun WorldSkills ASEAN 2025, Ester Araújo Pinheiro, sente orgullu tanba bele reprezenta Timor-Leste partisipa iha kompetisaun ne’e sai Best of the Nationas.
“Ne’e aumenta tan ha’u-nia skills foun nomós ajuda ha’u atu iha kompetisaun tuirmai, ha’u mós bele aprende liután hadi’a ha’u-nia skill”, dehan.
Timor-Leste nia partisipasaun ba dahuluk iha kompetisaun rejionál ida-ne’e maski la lori fila medalla ruma, maibe liuhusi kompetisaun ne’e bele hametin lasu amizade entre nasaun sudeste aziátiku sira.
Kompetisaun ASEAN ne’e hala’o iha World Trade Centre Manila durante loron tolu, partisipa husi nasaun membru ASEAN sira.
Jornalista : Arminda Fonseca
Editora : Maria Auxiliadora
