BAUKAU, 11 Setembru 2025 (TATOLI)—Autoridade suku husu Governu sentrál aselera dezenvolve sítiu turístiku Fatuk-Lenuk iha área Buruma, Postu Administrativu Baukau Vila, Munisípiu Baukau.
Xefe Suku Buruma, Libório dos Santos Freitas hateten Autoridade Munisipál Baukau (AMB) liuhosi Serbisu Munisipál Obra Publika relata ona dezeñu sítiu ne’e maibé to’o agora seidauk hetan atensaun mezmu Fatuk-Lenuk konsideradu nu’udár sítiu turizmu ne’ebé iha poténsia hodi atrai turista lokál no estranjeiru.
Tuir Libório katak Fatuk-Lenuk kategoria nu’udár sítiu turizmu nasionál, tanba konsideradu úniku nune’e bainhira dezenvolve sei hasa’e rendimentu komunidade iha área Buruma.
Notísia relevante: Autoridade Baucau planeia dezenvolve fatuk lenuk sai jardín
Fatuk-Lenuk rasik kategoria nu’udár fatuk jeoturístika tanba tama ba jeolojia nune’e iha tinan 2018, Governu liuhusi Ministériu Turizmu, Komérsiu no Indústria (MTKI) fó-sai nu’udár rekursu protejidu no planeia kontinua dezenvolve sai fatin turizmu.
“Ami husu ba Ministériu Turizmu no Munisipál atu hanoin oinsá bele dezenvolve didi’ak Fatuk-Lenuk ne’e sai fatin di’ak nune’e ema mai vizita,” Libório rekomenda.
Entretantu, Autoridade Munisipál Baukau hala’o ona levantamentu no finaliza dezeñu hodi dezenvolve Fatuk-Lenuk sai nu’udár turizmu komunitáriu ho medida 8×10, ho kustu orsamentu hamutuk rihun $60.
Husi kalkulasaun orsamentu referidu, sei utiliza hodi konstrui jardín, morru protesaun no saneamentu nune’e bele atrai vizitante no bele rekolla taxa ba kofre Estadu.
Jornalista: Natalino Belo
Editór: Xisto Freitas da Piedade
