CLN sosa ona hare-kulit tonelada 171 iha Kovalima
KOVALIMA ,11 Setembru 2025 (TATOLI)- Sentru Lojístiku Nasionál (CLN), Munisípiu Kovalima, konsege sosa ona hare-kulit tonelada 171 ho kilograma hamutuk 17,100 husi grupu agrikultór sira iha Kovalima.
Pontu Vokál CLN Kovalima, António Amaral, esplika produsaun hare-kulit époka ba dahuluk ne’e Asosiasaun Oebaba no Empreza Calvar Danses mak sosa hare-kulit husi agrikultór sira, hafoin Governu sosa husi empreza no asosiasaun sira ne’e.
“Ita-nia natar na’in sira ne’ebé mak kolleta hare-kulit informa ba ami funsionáriu CLN tuun ba terreñu atu buka hatene kuantidade produsaun hare-kulit husi agrikultór sira”, António Amaral, relata atividade ba TATOLI iha nia servisu fatin Bairru Kosta, ohin.
Prosesu atu hatene kuantidade hare-kulit liuhusi funsionáriu CLN utiliza mákina moderna hodi hatene nia kuantidade produsaun iha Kovalima
CLN mós hala’o atividade partilla informasaun ba komunidade sira kona-ba servisu no prezensa Sentru Lojístiku (CLN) iha Kovalima no mós forma ona grupu ne’ebé kada grupu ho nia membru na’in-20.
“ Ami nia servisu mak atu partilla informasaun kona-ba servisu CLN ba komunidade no mós oinsá atu halibur produsaun haree-kulit husi grupu hafoin empreza no asosiasaun sira sosa produsaun hare-kulit”, nia dehan.
Fó hanoin fali katak, iha 2024 iha époka ba dahuluk ne’e CLN sosa ona hare-kulit kilograma 1,750. Maibé hare-kulit kilograma 2,250 tetu ona CLN seidauk selu ho razaun tanba empreza hakarak halo natar-nain aumenta produsaun hare-kulit to’o tonelada haat .
Jornalista: Celestina Teles
Editór: Florencio Miranda Ximenes
