Ester Carion sai primeiru lugár ba kompetisaun diskursu públiku

VIKEKE, 11 Setembru 2025 (TATOLI)—Kompetisaun diskursu públiku ne’ebé Asosiasaun Feto Potensiál (AFP) Munisípiu Vikeke no Komisaun Nasionál Eleisaun (CNE sigla-portugeza) realiza, feto potensiál husi Postu Uatukarbau reprezenta Partidu Demokrátiku (PD) sai primeiru lugár.

Reprezentante Partidu Demokrátiku, Ester Carion da Conceição sente kontente bele sai vensedora ho valór 263.

“Ha’u sente orgullu partisipa kompetisaun diskursu públiku. Tanba ha’u foin partisipa primeiravéz, konsege sai primeiru lugár. Tanba ne’e, ha’u husu ba parte CNE no AFP Vikeke atu kontinua realiza kompetisaun ida-ne’e ba postu no suku sira hodi feto maluk seluk bele partisipa hotu,” Ester Carion da Conceição dehan ba TATOLI iha Salaun Edukasaun Munisipál Vikeke, Kinta ne’e.

Ester hatutan, matéria ne’ebé prepara ba kompetisaun diskursu públiku ne’e kona-ba “fiar aan no estratéjia hasoru dezafiu”.

“Ha’u prepara matéria hodi kompete iha kompetisaun diskursu públiku ne’ebé CNE no AFP Vikeke loke ba feto potensiál ka reprezentante partidu polítiku sira iha Munisípiu Vikeke,” nia hateten.

Carion kompromete sei prepara-aan didi’ak hodi kompete iha futuru tanba liuhusi kompetisaun sira-ne’e mak hasa’e abilidade ko’alia iha públiku.

Iha fatin hanesan, Sekretáriu Munisípiu Vikeke Asuntu Sosiál Organizasaun Komunitária, Acacio de Sousa agradese ba CNE no AFP Munisipál Vikeke loke kompetisaun ida-ne’e ba feto petensiál sira hodi konkorre.

“Ba konkorrente na’in-neen ne’ebé partisipa iha kompetisaun ne’e, ha’u husu atu promove nafatin imi-nia koñesimentu sira-ne’e ba imi-nia maluk feto sira iha baze,” nia enkoraja.

Kompetisaun diskursu públiku ne’e primeiru lugár ho valór 263, segundu lugár ho valór 249, terseiru lugár valór 247, kuartu lugár valór  246, kintu lugár valór 245 no sestu lugár valór 234.

Husi kompetisaun ne’e, CNE oferese sertifikadu ba konkorrente na’in-neen ho orasamentu ba manán-na’in sira mak  primeiru lugár hetan $70, segundu lugár $50, terseiru lugár $40, kuartu lugár $30, kintu lugár $25 no sestu lugár $20.

Enkuantu, juri ba kompetisaun diskursu públiku ne’e kompostu husi Pontu Vogál Sekretaria Estadu Igualidade (SEI) Munisípiu Vikeke, Salvador Ximenes, Inspetór CNE Nasionál, António Martins Soares no Reprezentante AFP Vikeke, Zulmira Fonseca.

Jornalista: Vitorino Lopez da Costa

Editór: Xisto Freitas da Piedade