DILI, 11 Setembru 2025 (TATOLI)—Diretora Jerál Planu, Polítika, Inkluzaun no Informátika Ministériu Edukasaun (ME), Odelia das Dores Ung Martins informa ME nia meiu ba família Julião da Costa ne’ebé virál iha mídia sosiál.
Diretora Odelia hato’o kestaun ne’e relasiona ho Julião da Costa, idade 13, hela iha Suku Laisorulai de Cima, Postu Administrativu Matebian, Munisípiu Baukau, ne’ebé hamutuk ho maun-alin na’in haat (4) la asesu ba edukasaun tanba nesesidade ekonomia família mak difísil.
“Ha’u rasik seidauk hetan informasaun kona-ba ida-ne’e, maibé atu dehan katak presiza halo kolaborasaun entre Edukasaun Munisípiu mai iha nasionál. Ministériu Edukasaun nafatin buka meiu hodi hakbesik ba família referida atubele asesu ba edukasaun,” Odelia das Dores dehan ba jornalista sira, iha Salaun ME, Vila Verde, Dili, Kinta ne’e.
Nia dehan ekonomikamente mak afeta ba labarik labele kontinua sira-nia eskola, Ministériu Edukasaun nia responsabilidade hakbesik aan ba sira (labarik efetadu) atubele buka solusaun ne’ebé di’ak ba sira.
Jornalista: Osória Marques
Editór: Xisto Freitas da Piedade
