DILI, 11 Setembru 2025 (TATOLI)—Prezidente Institutu Nasionál Formasaun Dosente no Profisionál Edukasaun (INFORDEPE), Domingos Martins informa Ministériu Edukasaun (ME) liuhusi INFORDEPE planeia kapasita formasaun karakter no pedagojia ba manorin hamutuk 600.
“Formasaun ne’e hala’o durante semana ida. Formasaun ne’e foka liubá karakter, pedagojia, kurríkulu, lejizlasaun no dixiplina. Tanba ita hatene katak totál manorin ensinu báziku hamutuk 600 ne’ebé mak liu ona teste iha tempu besik sei tuir formasaun. Tuir loloos ne’e realiza ona iha semana ikus liubá maibé la konsege, nune’e ita tenta loron-23 Setembru agora,” nia dehan ba jornalista sira iha Salaun Ministériu Edukasaun, Vila Verde, Dili, Kinta ne’e.
Notísia relevante: INFORDEPE fasilita ona formasaun ba manorin 400 bolsa kandidatu
Domingos Martins hatutan, daudaun ne’e, halo negosiasaun ba fatin formasaun referida. Nune’e tenta halo negosiasaun ho parte Ministériu Interiór ho Komandu Jerál PNTL nivel nasionál, atu oinsá oferese fatin formasaun.
“Ita halo negosiasaun ho Sentru Formasaun Polísia Komoro. Fatin ida-ne’e mak úniku ba sira ne’ebé daudaun ne’e iha faze negosiasaun,” Domingos haktuir.
Nia dehan manorin 187 mak sei tuir formasaun referida maibé sei fahe ba grupu tolu ka haat inklui mós monorin 600 ne’ebé maihusi Bolsa Kandidatu Ensinu Báziku tinan 2024 nian.
Jornalista: Osória Marques
Editór: Xisto Freitas da Piedade
