DILI, 11 Setembru 2025 (TATOLI)—Primeiru-Ministru (PM), Xanana Gusmão, hetan vizita husi Prezidente Petroliam Nasional Berhad Malázia (PETRONAS), Tengku Muhammad Taufik, hodi ko’alia kona-ba oportunidade kooperasaun serbisu iha furutu relasaun petróleu no minerál nian.
Xanana Gusmão hateten nia parte hetan vizita husi Prezidente PETRONAS, tanba empreza ne’e rasik hanesan belun ida ba Timor-Leste iha prosesu Greater Sunrise nian antes ne’e.
“Sira mai hasoru ha’u tanba antes ne’e sira mós apoiu ona Timor-Leste nia prosesu ba Greater Sunrise nian, entaun sira mai karik iha oportunidade bele serbisu hamutuk”, Xefe Governu hateten iha Palásiu Governu, ohin.
Prezidente PETRONAS Malázia, Tengku Muhammad Taufik, agradese tebes tanba iha oportunidade hasoru malu ho Primeiru-Ministru hodi halo diskusaun balun ba oportunidade bele serbisu hamutuk.
“Ami filafali mai hanesan belun, no ami hakarak tebes atu esplora oportunidade sira ne’ebé Timor-Leste hatudu ona, sei diskusaun barak tuirmai kona-ba oportunidade kooperasaun sira”, dehan.
Iha fatin hanesan, Ministru Petróleu no Rekursu Minerál, Francisco da Costa, hateten sira-nia parte akompaña empreza PETRONAS tanba iha Malázia sira koñesidu tebes iha área petróleu ninian.
Nia haktuir PETRONAS nia prezensa iha Timor-Leste nu’udar belun ida, tanba antes ne’e PETRONAS lidera husi Prezidente sesante Tan Sri Hassan Marican. Sira mai iha tinan 2002, 2004 no 2005 no oreferese bolsa estudu no treinamentu lubuk ida ba timoroan sira kona-ba área petróleu ninian.
Nia akresenta, iha 2008, PETRONAS nafatin lidera husi Hassan Marican, ninia polítika ajuda Timor-Leste konsege halo estudu ida naran estudu pré-viabilidade ba pipeline husi Greater Sunrise mai Timor-Leste.
“Husi estudu ida-ne’e mak fó ita bele dehan informasaun ne’ebé forte no profisionál tebes kona-ba posibilidade dada kadoras mai Timor-Leste no halo ita-nia indústria petrolíferu iha Kosta Súl”, nia dehan.
Entaun, iha sorumutu ohin ne’e mai atu haree katak iha poténsia no posibilidade iha futuru halo kooperasaun, forma kooperasaun detallu ne’e oinsá ekipa Timor-Leste ho sira sei diskute iha futuru, bainhira hetan ona akordu maneira atu koopera loloos ne’e oinsá.
“Sira-nia apoiu ne’e sempre preparadu hodi tulun polítika no planu sira ne’ebé Timor-Leste iha, tanba polítika no planu ne’e tenke husi ita, parseiru sira mai ne’e atu aliña hamutuk bele dezenvolve”, konklui.
PETRONAS (Petroliam Nasional Berhad) maka empreza multinasionál enerjia no mina-rai no gás nian ne’ebé na’in tomak maka Governu Malázia nian. Harii iha tinan 1974, PETRONAS kaer direitu tomak ba rekursu mina no gás Malázia nian no responsavel ba sira-nia jestaun no dezenvolvimentu, ho nia sede iha Kuala Lumpur.
Jornalista : Arminda Fonseca
Editora : Maria Auxiliadora
