VIKEKE, 12 Setembru 2025 (TATOLI)—Administradór Postu Vikeke Vila, Leopoldo da C. Alves hateten implementasaun karta sirkulár kona-ba orden ijiene públika hodi bandu abitante sira husik livre balada iha espasu públiku iha mudansa pozitiva tanba iha Vikeke Vila ema la husik ona balada livre iha espasu públiku.
“Ha’u sente karta sirkulár ne’ebé ita-nia autoridade munisípiu fó-sai iha fulan-Juñu ne’e, ha’u observa iha mudansa tanba agora ita haree iha vila laran ita-nia komunidade la husik livre animál hanesan uluk. Uluk karta sirkulár seidauk fó-sai ne’e animál la’o livre iha vila,” Leopoldo da C. Alves ba jornalista sira iha Vikeke Vila, Sesta ne’e.
Notísia relevante: https://tatoli.tl/2025/06/20/autoridade-vikeke-lansa-sirkular-bandu-animal-husik-livre-iha-espasu-publiku/
Administradór Postu Vikeke Vila ne’e hatutan katak bá-oin autoridade postu kontinua sosializa karta sirkulár ba populasaun sira iha suku sanulu (10) ne’ebé eziste iha Postu Vikeke atu komunidade sulan animál.
Tuir nia katak bainhira husik animál livre fó impaktu ba toos, natar no hafo’er sidade.
“Ha’u nafatin sujere ba komunidade Vikeke Vila kumpri karta sirkulár, atu labele husik livre animál. Se husik animál bele ba estraga ema nia toos, natar no hafo’er sidade,” Leopoldo sujere.
Jornalista: Vitorino Lopez da Costa
Editór: Xisto Freitas da Piedade
