MAPPF distribui manuál estensaun agríkola ba Autoridade Kovalima
KOVALIMA, 12 Setembru 2025 (TATOLI)-Ministériu Agrikultura Pekuária Peska no Floresta (MAPPF) liuhosi Diresaun Nasionál no Estensaun no Formasaun Agríkola, sesta ne’e, sosializa no distribui manuál kona-ba estensaun agríkola edisaun da-ruak ba Autoridade Kovalima.
Diretór Jerál Agrikultura Kafé Plantas no Indústria, Martinho Laurentino Soares, maka entrega manuál kona-ba estensaun agríkola ediasaun da-ruak ba Autoridade Kovalima hodi kontinua entrega tutan ba koordenadór estensionista husi postu administrativu Fatululik, Fatumea, Fohorem,Tilomar, Maukatar, Suai no Zumalai.
“Manuál estensaun ne’e ita husu apoiu husi TOMAK ho hanoin oinsá atu hakbiit estensionista sira iha baze bele prepara planu atividade iha relasaun ho servisu agrikultura iha munisípiu ida-idak ami distribui iha territóriu Kovalima mak distribui ikus,” Martinho Laurentino Soares, hateten ba jornalista sira iha Sentru Manutensaun Tratór Sanfuk.
Manuál estensaun agríkola sai baze ida atu tulun servisu agrikultura munisípiu, administradór postu administrativu , koordenadór estensionista sira iha postu administrativu hitu iha Kovalima hodi elabora ba planu atividade no orsamentu anuál kada tinan.
“Ohin loron ita dependensia ba ai-han importasaun boot ho esforsu hotu oinsá ita bele hakbiit ita-nia aan atu prodúz no hadia produsaun liliu ba ai-han ne’ebé ita-presiza tanba ita atu sai ona ba membru ASEAN nune’e bainhira ita atu faan produtu ba merkadu internasionál ne’e oinsá nune’e presiza hadia no esforsu hadia produsaun iha rai-laran,”nia hatutan.
Iha fatin hanesan Diretór Servisu Munisípiu Agikultura Kovalima, Lino Magno reforsa distribuisaun manuál ne’e hodi fasilita estensionista sira atu oinsá elobora planu estratéjiku ba tinan oin.
“Estensionista elobora planu estratéjiku bele foti haree iha item balun iha manuál estensaun agríkola hodi elabora iha planu nune’e bele halo dezenvolvimentu iha setór agrikultura la’o tuir manuál estensaun,” nia hateten.
Jornalista:Celestina Teles
Editór: Florencio Miranda Ximenes
