DILI, 12 Setembru 2025 (TATOLI)—Ministériu Solidariedade Sosiál no Inkluzaun (MSSI) prepara millaun $2.8-resin ba programa Bolsa da Mãe Kondisionál Saúde Nutrisaun ba inan isin-rua no oan.
“Tinan ne’e ita prepara ona osan millaun $2.8-resin ba programa ne’e hodi atende ita-nia ina- feton isin-rua iha munisípiu Ermera, Suai no Oekusi,” Diretór Jerál MSSI, Florencio Pina Dias Gonzaga ba TATOLI, iha Kaikoli, Dili, Sesta ne’e.
Notísia relevante: KM aprova dekretu-lei kriasaun subsídiu saúde-nutrisaun kondisionál ba inan isin-rua
Nia esplika objetivu hosi programa referidu atu hamenus redusaun ki’ak iha Timor-Leste, liuliu ba inan isin-rua no bebé ne’ebé vulneravel liu no liuhosi programa ne’e atu hasa’e inan isin-rua ho oan nia nutrisaun.
“Subsídiu ne’e ita fó inan isin-rua kada fulan tolu hetan $25 inklui ho ai-han nutritivu,” nia esplika.
Pina hateten manuál ba programa ne’e preparadu no hein opiniaun hosi Diresaun Kuidadu Saúde Primária Ministériu Saúde atubele haree hamutuk, nune’e bele implementa iha tinan ne’e.
Nia hatutan MSSI iha programa prioridade rua hanesan dezenvolvimentu institusionál no servisu no atendimentu sosiál.
MSSI prevee $26.188.602 iha proposta OJE 2025 hodi kontinua fó prioridade ba programa servisu no atendimentu sosiál ba povu. Orsamentu ne’e fahe ba saláriu no vensimentu $3.982.088, bens no servisu $10.744.951, transferénsia públika $9.501.672, kapitál menór rihun $500 no kapitál dezenvolvimentu $1.459.891.
Jornalista: Osória Marques
Editór: Xisto Freitas da Piedade
