BOBONARU,12 setembru 2025 (TATOLI) – Ministru Obra Publika,Samuel Marçal, hamutuk ho membru Parlamentu Nasionál inaugura Projetu Eletrifikasaun Nasionál (PEN) pakote hitu hodi fornese naroman eletrisidade ba uma-kain 146, iha aldeia Leber-Taz, Mabelis no Holsa-Taz, suku Leber, postu administrativu Bobonaru, munisípiu Bobonaru.
Ministru Samuel Marçal hateten Timor-Leste hakat tan pasu ida ba oin hodi hakonu povu nia esperansa ba ukun rasik-an.
Nia konfirma rezultadu ne’ebé atinje ne’e nu’udar orientasaun no esperansa Primeiru-Ministru Xanana Gusmão nian atu lori dezenvolvimentu ba povu sira iha área rurál.
“Ita tenke orgullu. Povu mak uluk harii rai ida-ne’e, liuliu katuas sira uluk halo polítika hodi harii nasaun ne’e. Maski sira iha susar nia-laran iha tinan naruk, ahi, estrada, bee laiha, maibé ita hakru’uk nafatin ba povu ida-ne’e, tanba fuan boot, esperansa la lakon, iha nafatin estabilidade husi aldeia to’o suku”, dehan.
Prezidente Komisaun F Pralamentu Nasionál, Maria Barreto Gorumali, konsidera inaugurasaun ne’e hanesan pasu ida ne’ebé iha rezultadu husi Governu hodi fó atendimentu ba povu iha área rurál.
Gorumali fiar katak enerjia elertrisidade ne’e sei tulun estudante sira estuda iha tempu kalan.
“Eletrisidade tama ona iha ita-boot sira-nia bairru, tama ona iha ita-boot sira-nia uma, husu ba inan-aman sira atu akompaña oan sira estuda, labele uza ba nonton demais telefone no halimar game”, nia katak.
Aleinde ne’e, Prezidente Konsellu Administrasaun Eletrisidade Timor-Leste (EDTL), Paulo de Jesus, afirma katak hahú iha tempu inaugurasaun ne’e ba oin, EDTL fó tempu fulan neen ba benefisiáriu sira asesu enerjia eletrika ho gratuita, maibé tenke utiliza tuir nesesidade nune’e bele poupa.
“Liu tiha fulan neen ita-nia tekniku sira sei mai halo sosializasaun para ita monta kontadór atu ajuda jere no uza enerjia ne’e ho di’ak no kontribui osan oituan para bele sosa mina ba iha jeradór iha Hera no Betanu”, Paulo afirma.
Xefe suku Leber, Arnaldo de Jesus, konsidera obra ne’e lori ona povu suku Leber sai husi nakukun ba hetan naroman.
“Ohin ami komunidade suku Leber tomak hetan ona naroman, ne’ebé durante husi tempu ba tempu ami hein hela. Ami terus iha nakukun laran, maibé ho prezensa IX Governu ami hotu moris iha naroman nia laran”, nia hato’o.
Suku Leber iha aldeia lima – aldeia Butuk mak asesu ona enerjia elétrika iha tinan 2012 no aldeia Holbese mak daudaun ne’e iha hela faze implementasaun Projetu Eletrifikasaun Komunitária (PEK).
Notísia relevante:
Jornalista: Sergio da Cruz
Editora: Maria Auxiliadora
