Membru kooperativa 60 husi Oekusi partisipa formasaun atu hamoris ekonomia lokál
DILI, 15 Setembru 2025 (TATOLI) – Membru Kooperativa Família Ki’ik (KFK) no Kooperativa Tane Kbi’it no Haburas Ekonomia Família (K-TABIHAEF) husi Oekusi hamutuk 60 partisipa iha formasaun bázika kona-ba kooperativa nian.
Atividade ne’e rasik hala’o durante loron lima, hahú loron 15 no sei ramata iha 19 Setembru 2025.
Sekretáriu Estadu Kooperativa, Arsénio Pereira, iha abertura formasaun ne’e hateten ezisténsia setór kooperativa importante tebes hodi kontribui ba dezenvolvimentu ekonomia nasaun nian.
“Governu iha para atende imi, hodi fó formasaun no motivasaun ba imi, maibé imi mak tenke halo esforsu iha terrenu, hamoris no dezenvolve kooperativa hodi kontribui ba dezenvolvimentu setór ekonomia iha ita-nia nasaun”, Arsénio Pereira hateten iha abertura formasaun bázika ba membru kooperativa sira husi Oekusi, iha salaun Esperansa, Delta, ohin.
Iha biban ne’e, nia parte husu ba membru kooperativa sira ne’ebé tuir formasaun atu aproveita didi’ak, nune’e filafali hodi implementa iha terrenu.
Tuir nia, atu kontribui ba dezenvolvimentu nasaun ida-ne’e la’ós de’it hothotu hetan pozisaun, maibé setór kooperativa mós importante tanba nu’udar ai-riin ekonomia ba setór privadu no públiku.
“Maibé, imi indivíduu mós bele halo atividad, nune’e sustenta moris. Ha’u sempre dehan setór kooperativa sai nu’udar fonte rendimentu primáriu. Husi ne’e, ita bele hetan rendimentu”, realsa.
Nia akresenta katak matéria sira ne’ebé fó iha formasaun bázika ne’e kona-ba saida mak kooperativa, kooperativa la’o oinsá, halo relatóriu no fó koñesimentu kle’an ba dirijente sira atu dezenvolve kooperativa iha futuru.
Nia subliña Sekretaria Estadu Kooperativa rasik rejista ona Movimentu Kooperativa Primária hamutuk 248, Federasaun Multikooperativa 12, Federasaun Kooperativa Kréditu rua no iha ona totál membru rihun 39 no akumula ona kapitál millaun $20,6.
“Ba oin ita planu atu harii fali konfederasaun kooperativa ho objetivu atu hamatan fali ba federasaun sira, tanba federasaun sira mak tau-matan ba kooperativa primária sira”, dehan.
Iha fatin hanesan, Prezidente Kooperativa Família Ki’ik (KFK), Lourenço Kefi, agradese ba Governu tanba disponibiliza ona formasaun, nune’e ba oin bele hamoris kooperativa iha área rurál sira.
“Oekusi dook tebes husi Dili, nune’e ho formasaun sira hanesan sei ajuda tebes ami iha futuru atu dezenvolve setór kooperativa ne’e ho di’ak, tanba ita hotu hatene kooperativa importante ida mós ba dezenvolvimentu ekonomia nasaun nian”, dehan.
Jornalista: Arminda Fonseca
Editora: Maria Auxiliadora
