DILI, 15 Setembru 2025 (TATOLI)-Prezidente Parlamentu Nasionál, Maria Fernanda Lay, konsidera kestaun mudansa klimátika sai ameasa boot ba mundu ohin loron, inklui Timor-Leste.
Tanba kestaun ne’e afeta liu ba populasaun ki’ak, vulneravel sira no produsaun agríkola no seluk tan.
“Parlamentu hala’o papél ativu hodi promove polítika ambientál ne’ebé responsavel, promove investimentu iha prátika agríkola emerjente sira no proteje populasaun sira ne’ebé hasoru liña dahuluk kona-ba efeitu krize klimátika boot ida-ne’e nian”, nia hato’o iha abertura sesaun lejislativa datoluk iha lejislatura daneen iha Parlamentu Nasionál, ohin.
Nune’e mos presiza tau atensaun ba dezafiu sériu sira kona-ba dezigualdade sosiál, liuliu ba ema ne’ebé vulneravel liu, feto, labarik, ferik-katuas sira no sira ne’ebé moris iha situasaun ki’ak, hasoru difikuldade boot liu atu asesu ba direitu konstitusionál báziku sira hanesan saúde, edukasaun, protesaun sosiál no seguransa, no saúde.
“Tanba ne’e realidade ida-ne’e ezije ita, reprezentante povu nian, kompromisu ida-ne’ebé metin no kontinua ba polítika inkluziva, justisa no transformativa”, nia apela.
Hodi husu ba Parlamentu atu hamutuk ho Governu, iha papél atu haree lejislasaun ho sensibilidade sosiál, promove diálogu entre instituisaun sira. “Ho ida-ne’e, ita bele kontribui ho determinasaun, atu harii sosiedade ida-ne’ebé justu liu, iha ne’ebé laiha ema ida mak husik hela”, nia hato’o.
Notísia relevante: CNRT-PD aprezenta dezempeñu koligasaun no opozisaun aponta dezafiu
Jornalista: Nelson de Sousa
Editora: Maria Auxiliadora
