BAUKAU, 07 Jullu 2026 (TATOLI)—Programa Nasionál Dezenvolvimentu Suku (PNDS) liuhusi atividade regulár implementa konstrusaun Sntru Komunitáriu rua iha Suku Tirilolo, Postu Administrativu Baukau Vila.
Xefe Suku Tirilolo, Elvino Freitas Belo, esplika implementasaun atividade referida atualmente hahú ona hafoin ramata prosesu kuotasaun iha-ne’ebé lokaliza iha fatin rua hanesan ida iha Sede Suku Betulale no seluk iha Aldeia Lielailesu.
“Servisu agora daudaun hahú ona, tanba materiál lokál no fabrikadu sira kuaze hatama hotu ona,” Elvino hateten iha Sede Suku Tirilolo, Baukau, Tersa ne’e.
Elvino Belo relata Konsellu Suku deside konstrui Sentru Komunitáriu tanba konsidera importante liuliu sorumutu nivel suku no atividade serimoniál balun ne’ebé presiza iha kondisaun no seguru. Sentru iha Aldeia Lielailesu ho medida 9×20m² no iha Sede Suku Betulale 15x20m².
Aleinde ne’e, Suku Tirilolo mós iha alokasaun orsamentu adisionál ne’ebé implementa reabilita eskala ki’ik ho tipu cor iha área risku ho totál distánsia kilómetru tolu iha aldeia haat hanesan Lielailesu, Parlamentu, Osso-ua ho Kaisidu tanba tinan naruk kondisaun estragu.
“Programa adisional deside iha-ne’ebá tanba fasilita komunidade no liga bá fatin istóriku atu komunidade bá vizita Saudozu Eroi Bie-Khirubi tanba dalan tama ladi’ak, nune’e fasilita bainaka sira bá vizita karik estrada di’ak,” Elvino Belo informa.
Suku Tirilolo tinan-ne’e hetan aloksaun orsamentu PNDS ho totál hamutuk $70.547 ne’ebé fahe ba atividade rua hanesan regulár hamutuk $38.546 no adisionál hamutuk $32.000.
Entretantu, Suku Tirilolo hamutuk aldeia neen kompostu husi Betulale, Kaisidu, Lutumutu, Lialailesu, Parlamentu no Ossoua ho totál populasaun hamutuk 7.277 husi xefe família 1.702.
Jornalista: Natalino Belo
Editór: Xisto Freitas da Piedade
