VIKEKE, 16 Setembru 2025 (TATOLI) – Abitante aldeia tolu husi Suku Uma Ki’ik, Postu Administrativu Vikeke Vila, Munisípiu Vikeke, preokupa empreza implementadór Uca-Aba Unipessoal Lda tanba abandona servisu projetu eletrifikasaun iha Suku Uma-Ki’ik.
“Ho situasaun ida-ne’e komunidade afetadu no benefisiáriu husi projetu eletrisidade ne’e ladún satisfasfeitu ho empreza Uca-Aba Unipessoal LDA ne’ebé manán projetu eletrifikasaun. Projetu ne’e abandona durante fulan lima (5) nia laran ona. Tanba ne’e, ami hanesan komunidade ne’ebé atu benefísia ba eletrisidade hakarak ezije ba empreza Uca-Aba Unipessoal LDA Tenke finaliza obra dada liña elitrisidade. Empreza labele abandona obra ida-ne’e ho durasaun tempu ne’ebé naruk,” nia haktuir liuhusi konferé nsia imprensa, ne’ebé realiza iha área implementasaun projetu eletrifikasaun nian, Tersa ne’e.
Portavós husu empreza atu aselera no finaliza iha fulan-Novembru tinan ida-ne’e.
Uma-kain 96 mak kontribui gratuitu plantasaun sira-ne’ebé fó rendimentu ekonomia hanesan ai-teka, nuu no seluktan.
“Objetivu kontribui plantasaun ne’e tanba empreza Uca-Aba Unipesoal LDA bele dada liña eletrisidade ba komunidade aldeia tolu hodi asesu ba liña eletrisidade. Ida-ne’e komunidade sira hola parte ona iha kontribuisaun ba dezenvolvimentu. Maibé, realidade empreza Uca-Aba la realiza obra tuir planu ne’ebé tau iha kuadru projetu, durasaun tempu ba obra dada liña eletrisidade fulan tolu nia laran de’it,” nia akresenta.
Biban ne’e, Portavós husu empreza Uca-Aba Unipesoal LDA labele bosok povu hodi estraga plantasaun sira-ne’ebé bele fó rendimentu.
“Ami prefere empreza Uca-Aba Unipessoal LDA atu bele hahú fali ona servisu iha fulan-Setembru 2025 nia laran. Iha Setembru nia laran mak la mai kontinua obra, mak ami sei hato’o keixa ba instituisaun relevante atu bele prosesu tuir Lei ne’ebé vigór iha ita-nia rai doben ida-ne’e,” nia hato’o.
Alende ne’e, nia husu, Autoridade Munisípiu Vikeke, Administradór Postu no Xefe Suku Uma-Ki’ik tenke halo monitorizasaun ba empreza Uca-Aba Unipessoal LDA nia servisu.
“Ami husu Autoridade Munisípiu Vikeke halo karta xamada ba empreza Uca-Aba Unipessoal LDA ne’ebé abandona servisu dada eletrisidade iha suku Uma-Ki’ik,” nia hatete.
Iha fatin hanesan, Xefe Aldeia Aina Uain, Cequito Pinto, hatutan obra ne’e empreza hari’i hotu ona ai-riin (poste) eletrisidade, maibé sira abandona servisu to’o agora la mosu iha fatin implementasaun obra.
“Empreza dehan ba ami sasán iha ona portu Tibar, maibé to’o agora ami hein sasán eletrisidade la mosu mai. Ami-nia preokupasaun sira-ne’e ami hato’o ona ba parte relevante sira, maibé seidauk iha resposta. Tanba ne’e, ami husu Eletrisidade de Timor-Leste, Empreza Públika (EDTL,E.P), atu haree empreza ne’ebé abndona servisu iha ami-nia suku – labele husik abandona nune’e,” nia sujere.
Nune’e mós, Reprezentante veteranu, Fernando da C.S Amaral, hatutan, povu nia nesesidade mak eletrisidade, bee-moos no estrada atu asesu. Povu área ida-ne’e la asesu eletrisidade tinan barak, Governu tau ona atensaun, maibé empreza implementadór sira mak abandona servisu.
“Ha’u sente triste ba projetu eletrifikasaun ne’ebé empreza abandona, tanba ne’e ha’u husu Governu hodi fó atensaun ba empreza implementadór hodi kontinua servisu, atu povu bele asesu ba eletrisidade,” nia realsa.
Benefisiáriu ba eletrisidade ne’e Suku Uma-Ki’ik kompostu husi Aldeia tolu (3) hanesan Makadean, Aina Uain, no Maroman. Totál uma-kain hamutuk 96.
Enkuantu, projetu eletrifikasaun husi EDTL,E.P ho númeru kontratu 004/wk/EDTL-EP-2025, valór kontratu $247,903.60, projetu referidu implementa husi empreza Uka-Aba unipessoal Lda, durasaun fulan tolu, hahú fulan-Janeiru 2025 to’o agora seidauk ramata.
Jornalista :Vitorino Lopes da Costa
Editór: Rafael Ximenes de A. Belo
