FDCH sei haruka bolseiru 100-resin ba eskola iha rai-li’ur
DILI, 16 Setembru 2025 (TATOLI)–Ministériu Planeamentu no Investimentu Estratéjiku liuhusi Fundu Dezenvolvimentu Kapitál Umanu (FDCH), iha fulan-Outobru no Novembru sei kontinua haruka tan bolseiru na’in-100-resin ba eskola iha Brazíl, Portugál, Malázia no Indonézia.
Ministru Planeamentu no Investimentu Estratéjiku, Gastão Sousa, hateten normalmente fulan-Outobru no Novembru mak sira sei gasta osan barak ba bolsa estudu nian.
“Entaun, iha loron 26 fulan ne’e ami sei halo despedida hamutuk ho estudante bolseiru hamutuk 100-resin ne’ebé hetan apoiu husi fundu dezenvolvimentu nian,” Ministru ne’e informa ba jornalista sira iha aeroportu Komoro, ohin.
Ministru ne’e dehan, kursu ne’ebé bolseiru sira sei hala’o ba mak iha área agrikultura, enjinária no saúde iha nasaun Portugál, Brazíl, Malázia, Indonézia durante tinan haat.
“Estudante bolseira sira ne’e hala’o estudu iha nivél lisensiatura no mós iha setór reforma Justisa nian,” nia dehan.
Enkuantu FDCH nia proposta orsamentu ba tinan 2025 hamutuk $18.973.544, ne’ebé mak sei finansia ba atividade 51, iha programa prinsipál haat (4) mak hanesan formasaun profisionál ho nia orsamentu $1.223.780 ne’ebé sei finansia atividade tolu, formasaun téknika ho nia orsamentu $2.051.682 sei finansia atividade 16, bolsa estudu ho nia orsamentu $13.956.821 sei finansia ba atividade 30 no funsionamentu no dezenvolvimentu institusionál ho nia orsamentu $1.741.261.
Jornalista : Alexandra da Costa
Editór : Cancio Ximenes
