DILI, 16 Setembru 2025 (TATOLI) – Hahú husi fulan-Janeiru to’o mai iha fulan-Augusto, Sentru Saúde Ermera rejista moras infeksaun Vias Respiratóriu Aguda (ISPA) hamutuk 600-resin, Diretór Servisu Saúde Munisipál Ermera, António de Fátima relata.
“Iha Ermera moras ne’ebé rejista maka’as ne’e ISPA, no pasiente ne’ebé rejista maka’as iha Sentru Saúde internamentu Gleno. Husi Janeiru to’o mai Agostu ne’e, ita rejista 600- resin, ne’e ba ISPA de’it,” Diretór António informa, iha Delta Nova, Tersa ne’e.
Ezekutivu ne’e hatutan, pasiente ne’ebé hetan moras ISPA ne’e maioria labarik tinan lima (5) mai kraik, no nia kauza ne’e barak liu husi ahi su’ar no rai-rahun inklui mós hahán ne’ebé la ijiéne.
“Nia kauza ne’e tanba ita-nia inan sira barak liu sei uza hela ahi matan, entaun ahi suar ne’e mós bele fó impaktu. Daudaun ne’e mós Ermera iha hela faze konstrusaun ba estrada entaun rai rahun mós fó impaktu, nune’e mós konxiénsia husi inan-aman rasik mak seidauk sufisiente atu halo prevensaun ba oan sira-nia aihan,” nia dehan dehan.
Fase liman molok prepara hahán
Alende ne’e moras rejista tuir mai mak diareia, ida-ne’e hahán mak la ijiéne inklui bee-moos.
Autoridade saúde Ermera ne’e hatutan, atu halo prevensaun ba moras diarea mak inan sira tenke fase liman moos bainhira atu prepara hahán ba oan sira. Nune’e sujere bainhira oan sira hetan moras referida tenke lori lalais ba sentru saúde ne’ebé besik atu hetan tratamentu husi pesoál saúde sira.
“Moras ISPA no moras diarea ne’ebé ita rejistu maka’as ne’e seidauk iha pasiente ida ne’ebé mak mate, tanba sira mai sentru saúde no ita-nia pesoál saúde sira halo tratamentu no sira rekupera fali, no iha balun ne’ebé ita konsidera grave ne’e ita rujuk ba Dili,” nia dehan.
Nia hatutan, servisu saúde kontinua esforsu hela hodi hasa’e frekuénsia ba iha promosaun edukasaun ba saúde para nune’e minimiza moras sira ne’ebé ho númeru aas ne’e.
“Nune’e iha aprezentasaun anuál ne’e ita hetan progresu barak. Ida-ne’e mak ita-nia objetivu, tanba ne’e mak promosaun saúde eziste nafatin iha sentru saúde sira, ne’ebé foka ba eskola no mós ba iha komunidade,” nia tenik.
Jornalista : Osória Marques
Editór: Rafael Ximenes de A. Belo
